ஃப்ளாஷ் நியூஸ்

    சிங்கப்பூர் வீரமாகாளியம்மன் ஆலயத்தில் மோசமான நிர்வாக சீர்கேடு...

    சிங்கப்பூர் வீரமாகாளியம்மன் ஆலயத்தில்  மோசமான நிர்வாக சீர்கேடு

    02/05/2018

    சிங்கப்பூர், மே 1: சிங்கப்பூரிலுள்ள ‘ஸ்ரீ வீரமாகாளியம்மன் ஆலயத்தில்’ மிக மோசமான நிர்வாக சீர்கேடு நடந்திருப்பதை அறக்கட்டளை ஆணையம் நடத்திய விசாரணையில் தெரிய வந்திருப்பதாக சிங்கப்பூர் கலாச்சார, சமூக மற்றும் இளைஞர் துறை அமைச்சு நேற்று திங்கட்கிழமை வெளியிட்ட அறிக்கையில் தெரிவித்திருக்கிறது.

    "கடந்த 2011 ஜனவரி 1ஆம் தேதி முதல் 2014 ஜூலை 31ஆம் தேதிக்கு இடைப்பட்ட காலத்தில், ஆலயத்தின் அறக்கட்டளையில், நிர்வாகச் சீர்கேடு நடந்திருப்பதை விசாரணை ஆணையம் கண்டறிந்திருக்கிறது. இதில் ஆலயத்தின் பொருளாளர்களும், காசோலைகளுக்கு கையெழுத்திடும் நிர்வாகக் குழு உறுப்பினர்களும் சம்பந்தப்பட்டுள்ளதையும் உறுதிப்படுத்தியிருக்கிறது" என சிங்கப்பூர் கலாச்சார, சமூக மற்றும் இளைஞர் துறை அமைச்சு தமது அறிக்கையில் குறிப்பிட்டிருக்கிறது.

    முன்னாள் நிர்வாகக் குழு தலைவர் ஆர்.செல்வராஜூ, முன்னாள் அறங்காவலர் மற்றும் நடப்பு நிர்வாகக் குழு தலைவர் சிவகடாச்சம், அறக்கட்டளையின் அறங்காவலர், நடப்பு செயலாளர் ராதா கிருஷ்ணன் செல்வக்குமார் ஆகியோர் இதில் சம்பந்தப்பட்டிருப்பதாகவும் அமைச்சின் அறிக்கை கூறுகின்றது.

    மேலும், கடமையில் கவனமின்மையும், அக்கறையின்மையும் இருப்பதையும், விசாரணை ஆணையம் கண்டறிந்திருக்கிறது.

    குறிப்பாக, குறுக்கே கோடு இடப்படாத காசோலைகளை வழங்கியது, அக்காசோலைகளை அறக்கட்டளையில் கொடுத்து பணமாக மாற்றிக் கொள்ள அனுமதித்தது போன்ற செயல்களை நிர்வாகிகள் செய்திருப்பதும் கண்டறியப்பட்டிருக்கிறது.

    கடந்த ஜனவரி 1, 2011 முதல் ஜூலை 31, 2014க்கும் இடையில் 1.5 மில்லியன் சிங்கப்பூர் டாலருக்கு குறுக்கே கோடு இடப்படாத காசோலைகளை ஆலய நிர்வாகம் வழங்கியிருக்கிறது என்பதும், 227,000 சிங்கப்பூர் டாலருக்கும் கூடுதலான தொகை கொண்ட 45 காசோலைகள் வருவாய் பெறும் நபர்களின் பெயர்களில் வழங்கப்படவில்லை என்பதும் விசாரணையில் அம்பலமாகியிருக்கிறது.

    குமார் என்பவருக்கு 350,000 சிங்கப்பூர் டாலருக்கு முறையாக, நிர்வாகக் குழு அனுமதியின்றியும், ஒப்பந்தம் இன்றியும், போதுமான ஆதாரங்கள் இன்றியும் கடன் வழங்கப்பட்டிருக்கிறது என்றும் அந்த அறிக்கை கூறுகின்றது.

    ...

    சீனா வெளியுறவு மந்திரி நாளை வடகொரியா பயணம்

    சீனா வெளியுறவு மந்திரி நாளை வடகொரியா பயணம்...

    02/05/2018

    பெய்ஜிங், மே 1:

    அடுத்தடுத்த அணு ஆயுத சோதனைகள் மூலம் கொரியா தீபகற்பத்தில் போர் பதற்றத்தை அதிகரித்து வந்த வடகொரியா தற்போது தனது நிலைப்பாட்டை மாற்றிக்கொண்டுள்ளது. அணு ஆயுத சோதனையை கைவிடுவதாக வடகொரியா தலைவர் கிம் ஜாங் அறிவித்தார். 65 ஆண்டுகள் நிலவிய பகையை மறந்து வடகொரிய, தென்கொரிய அதிபர்கள் சமீபத்தில் சந்தித்து பேச்சுவார்த்தை நடத்தினர்.

    இந்த பேச்சுவார்த்தையின் போது, அணு சோதனை கூடங்களை வடகொரியா மூட உள்ளதாக கிம் கூறியிருக்கிறார். மேலும், கொரியா போரை அமெரிக்கா முறைப்படி முடிவுக்கு கொண்டு வருவதுடன், தங்கள் நாட்டின் மீது தாக்குதல் நடத்த மாட்டோம் என அமெரிக்கா உறுதியளித்தால் அணு ஆயுதங்களை கைவிடவும் கிம் தயாராக உள்ளார்.

    இந்த சூழ்நிலையில், சீன வெளியுறவுத்துறை மந்திரி வாங்க் யி, இந்த வாரத்தில் வடகொரியாவுக்கு பயணம் மேற்கொள்கிறார். வடகொரிய வெளியுறவு மந்திரி ரி யோங் ஹோ விடுத்த அழைப்பை ஏற்று புதன், வியாழக்கிழமைகளில் வாங்க் சுற்றுப்பயணம் மேற்கொள்கிறார். சீனா வெளியுறவுத்துறை அமைச்சகம் இந்த தகவலை தெரிவித்து உள்ளது.

    இந்த பயணத்தின் போது, வடகொரியாவுடனான உறவை மேலும் வலுப்படுத்துவது உள்ளிட்ட பல்வேறு முக்கிய விவகாரங்கள் குறித்து ஆலோசனை நடைபெறும் என தெரிகிறது. கடந்த 2007ஆம் ஆண்டுக்குப் பிறகு சீன வெளியுறவுத்துறை மந்திரி, வடகொரியா செல்வது இதுதான் முதல் முறை என்பது குறிப்பிடத்தக்கது.

    ...
    அமெரிக்க ஜனாதிபதி டிரம்புடன் நைஜீரியா அதிபர் சந்திப்பு

    அமெரிக்க ஜனாதிபதி டிரம்புடன் நைஜீரியா அதிபர் சந்திப்பு...

    02/05/2018

    வாஷிங்டன், மே 1:

    அமெரிக்க அதிபராக டொனால்டு டிரம்ப் பதவி ஏற்று ஓர் ஆண்டு முடிந்து விட்டது. இருந்தும் இதுவரை ஆப்பிரிக்க நாடுகளைச் சேர்ந்த தலைவர்கள் யாரும் அமெரிக்கா சென்று அதிபரை சந்திக்கவில்லை.

    இந்த நிலையில் அவர் ஆப்பிரிக்க நாடான நைஜீரியா அதிபர் முகமது புகாரிக்கு அழைப்பு விடுத்தார். அதை ஏற்று அவர் வாஷிங்டன் சென்றுள்ளார்.

    வெள்ளை மாளிகையில் அவர் அதிபர் டிரம்பை சந்தித்து பேச்சு வார்த்தை நடத்துகிறார். அப்போது பொருளாதார வளர்ச்சி மற்றும் பயங்கரவாத ஒழிப்பு குறித்து விவாதிக்கப்படவிருக்கின்றது.

    நைஜீரியாவில் கடந்த 2009ஆம் ஆண்டு முதல் போகோஹாரம் பயங்கரவாதிகளின் ஆதிக்கம் அதிகரித்துள்ளது. அவர்கள் தொடர்ந்து தாக்குதல் நடத்தி வருகின்றனர்.

    கடந்த 9 ஆண்டுகளாக நடைபெற்று வரும் இந்த உள்நாட்டு போரை முடிவுக்கு கொண்டு வருவதில் நைஜீரியா அதிபர் புகாரி தீவிரமாக உள்ளார். எனவே பேச்சு வார்த்தையில் பயங்கரவாதிகளை ஒழிக்கும் நடவடிக்கை குறித்தும் முக்கியமாக ஆலோசிக்கப்படுகிறது.

    ...
    ஊழல்: பிரிட்டன் உள்துறை மந்திரி பதவி விலகினார்

    ஊழல்: பிரிட்டன் உள்துறை மந்திரி பதவி விலகினார்...

    02/05/2018

    லண்டன், மே 1:

    பிரிட்டன் நாட்டின் பிரதமராக பதவி வகித்து வருபவர் தெரசா மே. இவரது அமைச்சரவையில் உள்துறை மந்திரியாக இருந்து வருபவர் ஆம்பர் ரூட். சமீபத்தில் எதிர்க்கட்சிகள் இவர் மீது ஊழல் புகார் சுமத்தின.

    மேலும், பிரிட்டனில் வசிப்பதற்கு சட்ட விரோதமான முறையில் குடியுரிமை அளித்தது தொடர்பான பணிகளில் பல்வேறு முறைகேடுகள் நடந்துள்ளன எனவும் எதிர்க்கட்சிகள் புகார் தெரிவித்தனர். 

    இந்நிலையில், ஊழல் புகாரில் சிக்கிய உள்துறை மந்திரியான ஆம்பர் ரூட், தமது பதவியில் இருந்து நேற்று விலகினார். இதுதொடர்பாக, பிரதமர் தெரசா மேவுக்கு கடிதம் அனுப்பியிருந்தார்.

    கடிதத்தை பெற்றுக் கொண்ட பிரிட்டன் பிரதமர் அலுவலக அதிகாரிகள் கூறுகையில், ஆம்பர் ரூட்டின் பதவி விலகல் கடிதத்தை பிரதமர் தெரசா மே ஏற்றுக் கொண்டுள்ளார் என தெரிவித்தனர்.

    ...
    மியான்மர் நாட்டு மக்கள் அகதிகளாக சீனாவுக்கு ஓட்டம்

    மியான்மர் நாட்டு மக்கள் அகதிகளாக சீனாவுக்கு ஓட்டம்...

    02/05/2018

    யாங்கூன், ஏப்.30:

    மியான்மர் நாட்டில் ரோகிங்கியா முஸ்லிம் இன மக்கள் சிறுபான்மையினராக உள்ளனர். அவர்கள் மீது ராணுவம் தொடர்ந்து தாக்குதல் நடத்தி வந்தது. இதன் காரணமாக லட்சக்கணக்கான அந்த இன மக்கள் அருகில் உள்ள வங்காள தேசத்திற்கு அகதிகளாக ஓடினார்கள்.

    இந்த சம்பவம் உலக நாடுகளை அதிர்ச்சிக்குள்ளாக்கியது. உலக நாடுகள் கண்டனம் காரணமாக தாக்குதல் நடவடிக்கைகள் குறைந்து தற்போது அமைதி நிலவி வருகிறது.

    இந்த நிலையில் வடக்கு மியான்மர் பகுதியில் உள்ள கச்சின் பகுதியில் ராணுவத்தினர் அங்குள்ள சிறுபான்மையின மக்கள் மீது தாக்குதல் நடத்தி உள்ளனர். இந்த பகுதியில் கச்சின் என்ற தனி இன மக்கள் உள்ளனர். அவர்கள் பெரும்பாலும் கிறிஸ்துவ மதத்தை பின்பற்றுகிறார்கள்.

    தாங்கள் வசிக்கும் பகுதியை தன்னாட்சி பகுதியாக அறிவிக்க வேண்டும் என்று அவர்கள் நீண்ட காலமாக போராடி வருகிறார்கள். அவர்களை ஒடுக்கும் விதமாக ராணுவம் தாக்குதல் நடத்தியது.

    விமானம் மூலம் குண்டு வீசியதுடன், பீரங்கி தாக்குதல்களும் நடத்தினார்கள். இதில் பலர் காயம் அடைந்தனர். இந்த தாக்குதல் மேலும் அதிகரிக்கலாம் என்ற பயத்தில் அந்த பகுதி மக்கள் அங்கிருந்து வெளியேறி வருகிறார்கள்.

    அவர் சீனாவுக்குள் நுழைவதற்காக எல்லைப் பகுதிக்கு சென்றனர். ஆனால் சீன ராணுவம் அவர்களை தங்கள் நாட்டுக்குள் அனுமதிக்கவில்லை. இதனால் 4 ஆயிரத்திற்கும் மேற்பட்ட மக்கள் எல்லையிலேயே எந்த வசதியும் இல்லாமல் தங்கி உள்ளனர்.

    ஐ.நா. சபையில் அவர்களுக்கு உதவி வருகிறார்கள். இந்த சம்பவத்துக்கு அமெரிக்கா கண்டனம் தெரிவித்துள்ளது. வடக்குப் பகுதியில் உடனே அமைதியை ஏற்படுத்த வேண்டும் என்று மியான்மர் அரசுக்கு அமெரிக்கா வேண்டுகோள் விடுத்துள்ளது.

    ...
    அணு சோதனை கூடங்களை இழுத்து மூடும் வடகொரியா

    அணு சோதனை கூடங்களை இழுத்து மூடும் வடகொரியா...

    02/05/2018

    பியான்யங், ஏப்.30:

    65 ஆண்டுகள் நிலவிய பகையை மறந்து வட, தென்கொரிய அதிபர்கள் சமீபத்தில் சந்தித்து பேச்சுவார்த்தை நடத்தினர். இந்த பேச்சுவார்த்தையின் முக்கிய அம்சமே கொரிய பிராந்தியத்தில் அணு ஆயுத சோதனைகளை கைவிடுவது என்பதுதான். அணு ஆயுத சோதனைகள் நடத்தியது தான் வடகொரியா மீது அமெரிக்கா உள்ளிட்ட சர்வதேச நாடுகளின் கோபத்திற்கு காரணமாக இருந்தது.

    கிம் ஜாங் உன் - மூன் ஜேஇல் பேச்சுவார்த்தை வெற்றிகரமாக முடிந்துள்ள நிலையில், வரும் மே மாதம் பொதுமக்கள் மற்றும் சர்வதேச நிபுணர்கள் முன்னிலையில் அணு சோதனை கூடங்களை வடகொரியா மூடும் என தென்கொரிய அதிபரின் செய்தி தொடர்பாளர் தெரிவித்துள்ளார்.

    ஜூன் மாதத்தில் கிம் ஜாங் உன் - டிரம்ப் சந்திப்பு நடக்க உள்ள நிலையில், இது ஒரு முக்கிய நகர்வாக பார்க்கப்படுகிறது.

    ...
    அஜர்பைஜான் நாட்டில் உள்ள டிரம்ப் டவரில் திடீர் தீ விபத்து

    அஜர்பைஜான் நாட்டில் உள்ள டிரம்ப் டவரில் திடீர் தீ விபத்து...

    02/05/2018

    பாகு, ஏப்.30:

    அமெரிக்க அதிபரான டொனால்ட் டிரம்புக்கு அஜர்பைஜான் நாட்டு தலைநகர் பாகுவில் 33 மாடிகள் கொண்ட பிரமாண்ட கட்டிடம் உள்ளது.

    இந்நிலையில், நேற்று டிரம்ப் டவரில் திடீரென தீ பற்றியது. அங்கு பிடித்த தீ மளமளவென பரவியது. இதுதொடர்பான புகைப்படங்கள் சமூக வலைத்தளங்களில் பரவின.

    தகவலறிந்து அங்கு நான்கிற்கும் மேற்பட்ட தீயணைப்பு வாகனங்கள் விரைந்து வந்தன. சுமார் 50க்கு மேற்பட்ட வீரர்கள் போராடி தீயை அணைத்தனர். இந்த தீவிபத்தில் சிக்கி 4 பேர் படுகாயம் அடைந்துள்ளதாக முதல் கட்டமாக தகவல்கள் வெளியானது.

    ஏற்கனவே, ஏப்ரல் மாதம் 7ஆம் தேதி நியூயார்க்கில் உள்ள அதிபர் டிரம்ப் வீட்டில் தீ விபத்து ஏற்பட்டது என்பது குறிப்பிடத்தக்கது.

    ...
    மீண்டும் பயன்படுத்தும் புதிய வகை பிளாஸ்டிக் கண்டுபிடிப்பு

    மீண்டும் பயன்படுத்தும் புதிய வகை பிளாஸ்டிக் கண்டுபிடிப்பு...

    02/05/2018

    நியூயார்க், ஏப்.30:

    தற்போது பிளாஸ்டிக் கழிவுகள் சுற்றுச்சூழலுக்கு அச்சுறுத்தலாக உள்ளன. பயன்படுத்தப்பட்ட பின் வீசப்படும் அதன் கழிவுகள் மண்ணில் மக்கி போகாமல் பல ஆண்டுகளாக அப்படியே கிடக்கின்றன.

    எனவே, சுற்றுச்சூழல் கெடுவதை தடுக்கும் வகையில் புதிய வகை பிளாஸ்டிக் கண்டுபிடிக்கப்பட்டுள்ளது. அமெரிக்காவின் கொலரோடோ மாகாண பல்கலைக்கழகத்தை சேர்ந்த வேதியியலாளர்கள் இதை கண்டு பிடித்துள்ளனர்.

    இப்பல்கலைக்கழகத்தின் பேராசிரியர் இயுஜின்ஜென் என்பவரால் கண்டு பிடிக்கப்பட்ட இந்த பிளாஸ்டிக் நாம் தற்போது தினமும் பயன்படுத்து பிளாஸ்டிக் போன்ற தன்மை கொண்டது.

    அதிக உறுதி வாய்ந்தது. வளையும் தன்மை கொண்டது. வெப்பத்தை தாங்க கூடியது. இந்த பிளாஸ்டிக்கை மீண்டும் மீண்டும் பல தடவை பயன்படுத்த முடியும்.

    தற்போதைய பிளாஸ்டிக்கை மறு சுழற்சி செய்ய நச்சு தன்மை வாய்ந்த ரசாயன பொருட்கள் உபயோகிக்கப்படுகிறது. ஆனால் இதில் அத்தகைய நடவடிக்கைகள் தேவை இல்லை.

    புதிய வகை பிளாஸ்டிக்கில் பாலிமர் கலக்கப்பட்டுள்ளது. அதனால் அதை சாதாரண மறு சுழற்சி மூலம் பயன்படுத்தலாம். இதன் மூலம் பிளாஸ்டிக்கினால் ஏற்படும் சுற்றுச்சூழல் பாதிப்பை சரி செய்ய முடியும். மேலும் பிளாஸ்டிக் பொருட்களின் பற்றாக் குறை தீரும்.

    ...
    550 ஆண்டுகளுக்கு முன்பு பெரு நாட்டில்  140 குழந்தைகள் நரபலி

    550 ஆண்டுகளுக்கு முன்பு பெரு நாட்டில் 140 குழந்தைகள் நரபலி...

    02/05/2018

    லிமா, ஏப்.30:

    தென் அமெரிக்க நாடான பெரு நாட்டில், தொல்லியல் ஆராய்ச்சியாளர்கள் 140 குழந்தைகள் நரபலி கொடுக்கப்பட்டதையும், அவர்களது உடல்கள் புதைக்கப்பட்டு இருந்ததையும் கண்டுபிடித்து உள்ளனர்.

    பெரு நாட்டின் வட பகுதியில் அமைந்து உள்ள கடலோரப் பகுதியில் இந்த குழந்தைகளின் எலும்புக்கூடுகள் கண்டெடுக்கப்பட்டு உள்ளன.

    நரபலி கொடுக்கப்பட்ட குழந்தைகள், 5-14 வயதுக்கு இடைப்பட்டவர்கள். இவர்கள் 550 ஆண்டுகளுக்கு முன்பு நரபலி கொடுக்கப்பட்டு இருக்க வேண்டும் என்று கருதப்படுகிறது.

    முற்கால சிமு பேரரசு காலத்தில் இந்த சம்பவம் நடந்து இருக்க வேண்டும் என்றும் தகவல்கள் கூறுகின்றன. ஒரே நேரத்தில் இத்தனை பேர் நரபலி கொடுக்கப்பட்டு இருப்பது வரலாற்றில் இதுவே முதல் முறையாக இருக்கும் என கூறப்படுகிறது.

    ...
    அமெரிக்காவின் வெளியுறவு துறை அமைச்சரானார் மைக் போம்பியோ

    அமெரிக்காவின் வெளியுறவு துறை அமைச்சரானார் மைக் போம்பியோ...

    02/05/2018

    வாஷிங்டன், ஏப்.30:            

    அமெரிக்க வெளியுறவு அமைச்சராக சிஐஏ முன்னாள் இயக்குநர் மைக் போம்பியோ (54) பதவியேற்றார்.

    அமெரிக்க வெளியுறவு அமைச்சராக இருந்த ரெக்ஸ் டில்லர்சன் கடந்த மாத இறுதி யில் பதவியிலிருந்து நீக்கப்பட்டார். புதிய வெளியுறவு அமைச்சராக மைக் போம்பியோவை அதிபர் ட்ரம்ப் நியமித்தார். இவரது நியமனத்துக்கு செனட் அவை நேற்று ஒப்புதல் அளித்தது.

    இதைத்தொடர்ந்து, அமெரிக்காவின் 70ஆவது வெளியுறவு அமைச்சராக மைக் போம்பியோ பதவியேற்றார். அவருக்கு உச்ச நீதிமன்ற நீதிபதி சாமுவேல் அலிட்டோ பதவிப் பிரமாணம் செய்துவைத்தார்.

    மைக் போம்பியோவுக்கு அதிபர் ட்ரம்ப் வாழ்த்து தெரிவித்துள்ளா். அவர் தனது வாழ்த்துச் செய்தியில், "தேசப்பற்று மிகுந்தவரான போம்பியோ அதிக ஆற்றலும் புத்திக்கூர்மையும் கொண்டவர். நாடு சிக்கலான தருணத்தை எதிர்கொண்டுள்ள இவ்வேளையில் வெளியுறவு அமைச்சகத்தை இவர் திறமையுடன் வழிநடத்துவார் என நம்புகிறேன்" என்று குறிப்பிட்டுள்ளார்.

    பதவியேற்பு நிகழ்ச்சி முடிந்ததும் வரும் 30ஆம் தேதி வரை பிரசல்ஸ், ரியாத், ஜெருசலேம், அம்மான் நகரங்களுக்கு போம்பியோ செல்வார் என்று வெளியுறவு அமைச்சகம் அறிவித்தது. அமைச்சராக பொறுப்பேற்ற பின் போம்பியோ முதல் பயணமாக பெல்ஜியம் சென்றார். அங்கு பிரசல்ஸில் நடைபெற்ற நேட்டோ வெளியுறவு அமைச்சர்கள் மாநாட்டில் அவர் பங்கேற்றார்.

    ...
    ஏமனில் சவுதி கூட்டுப்படையினரின் விமான தாக்குதலில்  50 ஹவுத்தி போராளிகள் பலி

    ஏமனில் சவுதி கூட்டுப்படையினரின் விமான தாக்குதலில் 50 ஹவுத்தி போராளிகள் பலி...

    30/04/2018

    சனா, ஏப்.29:

    ஏமன் நாட்டின் அரசுக்கு எதிராக ஈரானின் ஆதரவுடன் உள்நாட்டு ஹவுத்தி புரட்சிப் படையினர் கடந்த இரண்டாண்டுகளாக ஆயுதப் போராட்டத்தில் ஈடுபட்டு வருகின்றனர். அவர்கள் சனா உள்பட பலப்பகுதிகளை தங்கள் கட்டுப்பாட்டுகள் வைத்து அந்த பகுதிகைளைச் சுற்றி சோதனைச் சாவடிகள் அமைத்துள்ளனர்.

    சர்வதேச ஆதரவு பெற்றுள்ள ஏமன் அரசுக்கு சவுதி அரேபியா தலைமையிலான கூட்டுப் படைகள் ஆதரவு அளித்து வருகின்றன. அவர்கள் ஹவுத்தி கிளர்ச்சியாளர்களை குறிவைத்து விமான தாக்குதல்களை நடத்தி வருகின்றனர். இந்த தாக்குதலில் சில நேரங்களில் அப்பாவி பொதுமக்களும் கொல்லப்படுகின்றனர்.

    இந்நிலையில், ஏமன் தலைநகர் சனாவில் உள்ள ஹவுத்தி புரட்சிப் படையினரின் உள்துறை அமைச்சக கட்டிடத்தை குறிவைத்து சவுதி கூட்டுப்படைகள் நேற்று விமான தாக்குதல் நடத்தினர். இந்த தாக்குதல்களில் ஹவுத்தி புரட்சிப் படையைச் சேர்ந்த இரு தளபதிகள் உட்பட 50 பேர் கொல்லப்பட்டதாக சவுதி ஊடகங்கள் செய்தி வெளியிட்டுள்ளன. இந்த தாக்குதல் சம்பவத்தை ஹவுத்தி படையினர் உறுதி செய்துள்ளனர். ஆனால் பலி எண்ணிக்கை குறித்து அவர்கள் செய்தி வெளியிடவில்லை.

    மத்திய கிழக்கு நாடுகளான ஏமன், சிரியா, ஈராக், லெபனானில் தங்கள் ஆதிக்கத்தை நிலைநாட்ட ஈரான், சவுதி அரேபியா நாடுகள் முயற்சித்து வருகின்றன. அரசுப் படைகளுடன் புரட்சிப் படையினர் நடத்திவரும் மோதலில் இதுவரை பத்தாயிரத்துக்கும் அதிகமான பொதுமக்கள் உயிரிழந்துள்ளனர் என்பது குறிப்பிடத்தக்கது.

    ...
    ஜெருசலேமில் அமெரிக்க தூதரகம் திறப்பு விழா  டொனால்ட் டிரம்ப் பங்கேற்கிறார்

    ஜெருசலேமில் அமெரிக்க தூதரகம் திறப்பு விழா டொனால்ட் டிரம்ப் பங்கேற்கிறார்...

    30/04/2018

    வாஷிங்டன், ஏப்.29:

    அமெரிக்க அதிபர் தேர்தல் பிரசாரத்தின் போது, ஜெருசலேமில் அமெரிக்க தூதரகம் அமைக்கப்படும் என ட்ரம்ப் குறிப்பிட்டிருந்தார்.

    இதன் தொடர்ச்சியாக இஸ்ரேலின் தலைநகராக ஜெருசலேமை அங்கீகரிக்க அமெரிக்கா தயாராக இருப்பதாக சமீபத்தில் அறிவித்தார். சுமார் 100 கோடி டாலர்கள் செலவில் கிழக்கு ஜெருசலேம் பகுதியில் பிரமாண்டமான அமெரிக்க தூதரகம் அமைக்கும் பணிகள் நடைபெற்று வருகின்றன.

    இந்த தூதரகத்தின் திறப்பு விழாவில் அமெரிக்க அதிபர் டிரம்ப் கலந்து கொள்ளலாம் என ஊடகங்கள் தெரிவித்திருந்தன.

    இந்நிலையில், ஜெர்மனி நாட்டின் பிரதமரை நேற்று வாஷிங்டன் நகரில் உள்ள வெள்ளை மாளிகையில் சந்தித்துப் பேசிய டொனால்ட் டிரம்ப், அவருடன் கூட்டாக செய்தியாளர்களுக்கு பேட்டி அளித்தார்.

    பல ஆண்டு காலமாக, பல்வேறு அமெரிக்க அதிபர்கள் அளித்து நிறைவேற்றப்படாத வாக்குறுதியாக ஜெருசலேம் விவகாரம் இருந்து வந்துள்ளது. அவர்கள் அனைவருமே தேர்தல் பிரசாரத்துக்காக வாக்குறுதி அளித்திருந்தனர். ஆனால், அதை நிறைவேற்றக்கூடிய தைரியம் அவர்களுக்கு இல்லை. ஆனால், நான் அதை நிறைவேற்றி முடித்து இருக்கிறேன்.

    ஜெருசலேமில் கட்டப்படும் தூதரகத்துக்கு நாம் வெகு குறைவாகவே செலவு செய்துள்ளோம். அந்த பணிகளை கவனித்துக் கொள்ள சிலர் இருக்கிறார்கள். அவர்கள் பலநூறு கோடி டாலர்களில் மிக பிரமாண்டமாக இதைச் செய்து முடிப்பார்கள்.

    இந்த புதிய தூதரகம் விரைவில் திறப்புவிழா காணவுள்ளது. இதில் நான் பங்கேற்பதை பெருமையாகக் கருதுகிறேன் என்று இந்த பேட்டியின்போது டிரம்ப் குறிப்பிட்டார். 

    ...
    சீனா பயணத்தை நிறைவு செய்த  பிரதமர் மோடி தாயகம் புறப்பட்டார்

    சீனா பயணத்தை நிறைவு செய்த பிரதமர் மோடி தாயகம் புறப்பட்டார்...

    30/04/2018

    பெய்ஜிங், ஏப்.29:

    நாட்டின் பிரதமராக பதவியேற்ற பின்னர் நான்காவது முறையாக சீனா சென்ற பிரதமர் நரேந்திர மோடி தோக்லாம் எல்லை பிரச்சினை உள்ளிட்ட பல்வேறு விவகாரங்கள் தொடர்பாக நேற்று வுஹான் நகரில் சீன அதிபர் ஜி ஜின்பிங் உடன் ஆலோசனை நடத்தினார்.

    ஒவ்வோர் ஆண்டும் இதுபோன்ற மாநாடுகள் நடத்தப்பட வேண்டியது அவசியம் என இந்த ஆலோசனையின்போது பிரதமர் மோடி வலியுறுத்தினார். அடுத்த 2019ஆம் ஆண்டு இதுபோன்ற உச்சி மாநாடு இந்தியாவில் நடைபெற்றால் நான் மிகவும் மகிழ்ச்சி அடைவேன் என்று அவர் குறிப்பிட்டபோது சீன அதிபரும் மகிழ்ச்சியுடன் இந்த கருத்தை ஆமோதித்தார்.

    இன்று இரண்டாவது நாளாக படகு இல்லத்தில் சவாரி செய்தவாறு இந்தியா - சீனா இடையிலான பல்வேறு தரப்பு நல்லுறவுகளை பலப்படுத்துவது தொடர்பாக ஜி ஜின்பிங் - பிரதமர் மோடி ஆலோசித்தனர்.

    பின்னர், இரண்டுநாள் சுற்றுப்பயணத்தை நிறைவு செய்த பிரதமர் நரேந்திர மோடி தனி விமானம் மூலம் வுஹான் நகரில் இருந்து இந்தியா புறப்பட்டார். அவரை விமான நிலையத்தில் சீன மந்திரிகள் மற்றும் வெளியுறவுத்துறை அதிகாரிகள் வழியனுப்பி வைத்தனர்.

    ...