ஊழல் குறித்து தகவல்களை தெரிவிக்க புதிய ரோபோட்...

ஊழல் குறித்து தகவல்களை தெரிவிக்க புதிய ரோபோட்

22/02/2018

உலகில் அனைத்து பணிகளையும் மனிதர்களை விட விரைவாகச் செய்ய ரோபோக்கள் கண்டுபிடிக்கப்பட்டு வருகின்றன. அவ்வாறு பல்வேறு துறைகளில் அசத்தி வரும் ரோபோக்கள் தற்போது மனிதர்கள் செய்யும் ஊழலை கண்டுபிடிக்கவும் பயன்படுத்தப்பட உள்ளன. அத்தகைய ரோபோட்டை ஸ்பெயின் நிபுணர்கள் தயாரித்துள்ளனர்.

அந்நாட்டில் உள்ள வல்லாடோலித் பல்கலைக்கழகம் இந்த அரிய கண்டுபிடிப்பை நிகழ்த்தியுள்ளது. செயற்கை நுண்ணறிவு தொழில்நுட்பம் மூலம் இந்த ரோபோட் உருவாக்கப்பட்டுள்ளது. இந்த ரோபோட்டிடம் நாம் சந்தேகப்படும் வியாபாரம் குறித்தோ, திட்டம் குறித்தோ தகவல் கொடுத்தால் அதில் ஊழல் நடந்து இருக்கிறதா? இல்லையா? என்பது கண்டறியப்படும். இந்த ரோபோட்டில் இதுவரை நடந்த பல்வேறு ஊழல்கள் குறித்த தகவல்கள் அடங்கியிருக்கும்.

அதையும், நாம் கொடுக்கும் தகவலையும் அது சரிபார்க்கும். அதேபோல் அந்த தலைவர்களின் வாழ்க்கை வரலாறு, அந்த கட்சியின் செயல்பாடு, அவர் பேசியது, அந்த ஊழல் குறித்து அவர் கூறியது என அனைத்தையும் அந்த ரோபோட் சரிபார்க்கும். இதன்மூலம் ஊழல் கண்டுபிடிக்கப்படும்.

இந்த ரோபோட் தவறு எவ்வளவு நடந்திருக்க வாய்ப்பு இருக்கும் என்று சதவிகிதம் கொடுக்கும். 70 சதவிகிதத்திற்கு அதிகமாக இருந்தால் கண்டிப்பாக ஊழல் நடக்க வாய்ப்பு இருப்பதாக கூறப்பட்டுள்ளது. தற்போது தயாரிக்கப்பட்டுள்ள ரோபோவில் ஸ்பெயினில் கடந்த 2000ஆம் ஆண்டில் இருந்து நடந்த ஊழல் குறித்த தகவல்கள் மெமரியில் ஏற்றப்பட்டுள்ளது.

...

புற்றுநோய் கட்டிகளை அழிக்கும் புதிய சிகிச்சை முறை

புற்றுநோய் கட்டிகளை அழிக்கும் புதிய சிகிச்சை முறை...

14/02/2018

நியூயார்க், பிப்.15:

இருதய நோய்க்கு அடுத்து புற்று நோயால் ஏற்படும் உயிர் இழப்புகள் அதிகமாக இருக்கின்றன. ஆரம்ப நிலையில் கண்டுபிடிக்கப்படும் புற்றுநோய் எளிதாக குணப்படுத்தப்படுகின்றது. சில வகை புற்றுநோய்கள் அறிகுறிகள் இல்லாமல் உருவாகும். இதனால் அவற்றை குணப்படுத்த முடியாமல் போகிறது. கீமோதெரபி, அலோபதி போன்ற பல சிகிச்சைகள் மேற்கொள்ளப்பட்டாலும் முழுமையாக குணப்படுத்த முடியவில்லை.

இந்நிலையில், அமெரிக்காவைச் சேர்ந்த அரிசோனா பல்கலைக்கழக ஆராய்ச்சியாளர்கள் புதிய சிகிச்சை முறையைக் கண்டறிந்துள்ளனர். அதனை எலியின் உடலில் பரிசோதித்து வெற்றி பெற்றதாக கூறியுள்ளனர்.

இந்த புதிய சிகிச்சையின் படி, முதலில் புற்று நோய் கட்டிகளுக்கு செல்லும் ரத்த ஓட்டத்தைத் தடுக்க வேண்டும். உடலில் அடிப்பட்ட போது ரத்தம் வெளியேறுவதை தடுக்க கொடுக்கப்படும் மருந்துகளை இந்த சிகிச்சை முறைக்கு பயன்படுத்துகின்றனர். அவை டி.என்.ஏ. நிறைந்த நானோ ரோபோட்டுகள் மூலம் செலுத்தப்பட்ட உடன் ரத்த ஓட்டம் நிறுத்தப்படும். இதனால் கேன்சர் செல்கள் செயலிழக்கின்றன. அதன் பின் கட்டிகள் சுருங்கிக் கொண்டே இருக்கும். கேன்சர் செல்கள் பரவுவதும் குறையும்.

 

புற்றுநோயால் பாதிக்கப்பட்ட எலிகளிடம் செய்த சோதனையில், சிகிச்சைக்கு பிறகு எலிகளின் வாழ்நாள் மற்ற எலிகளை விட இரண்டு மடங்காக அதிகரித்ததாக மருத்துவர்கள் தெரிவித்தனர். மேலும் இதனை மனிதர்களைப் போன்ற உடல் உறுப்புகளைக் கொண்ட பாமா மினியேச்சர் பன்றியின் உடலிலும் சோதனை செய்தனர். விரைவில் மனிதர்களுக்கு இச்சோதனை செய்யப்படும் என மருத்துவர்கள் தெரிவித்தனர்.

...
உலக மகா ராக்கெட் விண்ணில் பாய்ந்தது!  நாசாவை மிஞ்சிய தனியார் நிறுவனம்

உலக மகா ராக்கெட் விண்ணில் பாய்ந்தது! நாசாவை மிஞ்சிய தனியார் நிறுவனம்...

09/02/2018

நியூயார்க், பிப். 9:  கடந்த 2011ஆம் ஆண்டில் 'ஸ்பேஸ் ஷட்டில்' எனப்படும்  விண்வெளிக் கலத்தைத் தயாரிக்கும் வேலையை  'நாசா' நிறுத்திவிட்டது என்றாலும் நாசாவை மிஞ்சும் வகையில் தனியார் நிறுவனம் ஒன்று நேற்று வெற்றிகரமாக  'ஃபல்கன் ஹெவி' என்ற மிகப்பெரிய ராக்கெட்டை விண்வெளியில் பாய்ச்சியது.

விண்வெளிக் கலங்களை உருவாக்குவதை விட்டுவிட்டு நாசா, அதற்குப் பதிலாக பூமியின் சுற்றுவட்டப்பாதை வரை மட்டும் செல்லும் ராக்கெட்டுகளை உருவாக்கி வந்தது. பூமிக்கு வெளியே நடக்கும் ஆராய்ச்சிகள் அனைத்தும் வானத்தில் இருக்கும் விண்வெளியிலுள்ள அனைத்துலக விண்நிலையத்தில் இருந்து மேற்கொள்ளப்பட்டன.

இதனால் நாசாவின் செவ்வாய்க் கிரகப் பயண ஆசை கனவாகவே இருக்குமோ என்று நினைக்கப்பட்டது. ஆனால் தற்போது உலகின் பெரிய ராக்கெட்டான ''ஃபல்கான் ஹெவி'' என்ற விண்வெளி ராக்கெட்  'ஸ்பேஸ் எக்ஸ்' என்ற நிறுவனம் மூலம் ஏவப்பட்டு இருக்கிறது.

இதில் உலகில் எந்த ராக்கெட்டிலும் இல்லாத பல சிறப்பு அம்சங்கள் உள்ளன. ஸ்பேஸ் எக்ஸ் நிறுவனத்தின் நிறுவனர் எலோன் மஸ்க்கின் கனவுத் திட்டம்  ஃபல்கான் ஹெவி  என்று கூறலாம். உலகிலேயே இதுதான் பெரிய சக்தி வாய்ந்த ராக்கெட் ஆகும்.

18 போயிங் விமானங்களுக்கு இணையான சக்தியும், 747 ஜெட் விமானங்களுக்கு இணையான வேகமும் கொண்டது இது என்று கூறப்படுகிறது.

நேற்று முன்தின நள்ளிரவு 12.00 மணிக்கு இந்த ராக்கெட் வெற்றிகரமாக ஏவப்பட்டது. அப்போலோ 11 ஏவப்பட்ட அதே இடத்தில் இருந்து 18,747 ஜெட் வேகத்தில் ஏவப்பட்டு இருக்கிறது. இவ்வளவு பெரிய சக்தியை உருவாக்க இதில் 27 எஞ்சின்கள் பயன்படுத்தப்பட்டு இருக்கின்றன.

பொதுவாக ஒரு ராக்கெட் பூமியை விட்டு வெளியே சென்றதும் திரும்பி பூமிக்கு வரும் போது காற்றில் உராய்வு ஏற்பட்டுத் தீ பற்றி எரியும். இதுவரை எல்லா ராக்கெட்டுகளும் இப்படித்தான் செயல்பட்டு வந்தன. ஆனால் அதை சில வருடங்களுக்கு முன்பே ஸ்பேஸ் எக்ஸ் நிறுவனம் முறியடித்தது. எதிர்காலத்தில் நிலவிற்கும், செவ்வாய்க்கும் மனிதர்களை அனுப்ப இந்த ராக்கெட் பயன்படுத்தப்படவுள்ளது.

...
உலகின் மிக சக்திவாய்ந்த ராக்கெட்  வெற்றிகரமாக விண்ணில் ஏவப்பட்டது

உலகின் மிக சக்திவாய்ந்த ராக்கெட் வெற்றிகரமாக விண்ணில் ஏவப்பட்டது...

08/02/2018

கலிபோர்னியா, பிப்.8:

கலிபோர்னியா மாகாணத்தில் ஸ்பேஸ்-எக்ஸ் நிறுவனம் புதிய ரக ராக்கெட்டுகளை தயாரித்து வருகிறது. விண்வெளி ஆராய்ச்சியில் அமெரிக்காவை உலகத்தரத்தில் உயர்த்தியதில் இந்நிறுவனம் முக்கிய பங்கு வகித்து உள்ளது.

உலகின் மிக சக்தி வாய்ந்த அதிக வேகத்தில் செல்லும் புதிய ரக ஃபெல்கான் ராக்கெட்டை இந்நிறுவனம் தயாரித்துள்ளது. ராக்கெட்டில் உள்ள மூன்று உயர்த்திகளில் மொத்தம் 27 என்ஜின்கள் உள்ளன. இந்த என்ஜின்கள் அனைத்தும் மொத்தமாக இணைக்கப்பட்டுள்ளன.

இந்த ராக்கெட் மற்ற ராக்கெட்டுகளை விட அதிக எடை கொண்ட செயற்கைக்கோள்களை சுமந்து செல்லும் திறன் கொண்டது. அது 1 லட்சத்து 40 ஆயிரம் பவுண்ட் எடையுடன் பூமி வட்டப்பாதையைச் சுற்றி வரும் வகையில் வடிவமைக்கப்பட்டுள்ளது. செவ்வாய்க்கிரகத்திற்கு 40 ஆயிரம் பவுண்ட் எடையுடன் சுற்றி வரும் திறன் கொண்டது.

இந்நிலையில், நேற்று ஃபெல்கான் ராக்கெட்டை புளோரிடா கடல் பகுதியில் உள்ள விண்வெளிதளத்தில் இருந்து விண்ணிற்கு வெற்றிகரமாக செலுத்தினர். பெரும் புகையுடன் சென்ற ராக்கெட்டை ஏராளமானோர் கண்டு ரசித்தனர். தற்சமயம் ராக்கெட் பூமி வட்டப்பாதையில் வெற்றிகரமாக சுற்றி வருகிறது. ஃபெல்கான் ராக்கெட் போன்று மிக சக்தி வாய்ந்த ராக்கெட்டுகள் வரிசையாக வெளியிடப்படும் என அந்நிறுவனம் தெரிவித்துள்ளது.

...
எல்லாமே விவேகமயம்

எல்லாமே விவேகமயம்...

10/01/2018

விவேக கைபேசிகள், விவேக கைக்கடிகாரங்கள் என நீளும் பட்டியலில் இப்போது விவேக சாதனங்களும் சேர்ந்திருக்கின்றன. கூகுள், அமேசான், ஆப்பிள் உள்ளிட்ட நிறுவனங்கள் இந்தப் பிரிவில் ஆர்வம் காட்டி வருகின்றன. இல்லங்களில் செயல்படக்கூடிய இணையத்துடன் இணைக்கப்பட்ட நவீன சாதனங்களாக இவை இருக்கின்றன. தேவைக்கேற்ப பாடல்களை ஒலிபரப்பும், அலாரம் அடித்தால் கதவைத் திறக்கும் திறன் கொண்ட அம்சங்கள் இந்த விவேக இல்ல சாதனங்களில் பரவலாகி புழக்கத்துக்கு வரக்கூடும்.

 

...
நிதி நுட்ப சேவைகள்

நிதி நுட்ப சேவைகள்...

10/01/2018

கடந்த ஆண்டு டிஜிட்டல் பரிவர்த்தனை கவனத்தை ஈர்த்த நிலையில், புதுமையான நிதி நுட்ப சேவைகளை இந்த ஆண்டு கூடுதலாக எதிர்பார்க்கலாம். இணையம் மூலம் பல்வேறு நிதிச் சேவைகளை வழங்குவதற்கான சேவைகளும் செயலிகளும் அறிமுகமாகலாம். ‘பியர் டு பியர்’ கடன் எனச் சொல்லப்படும் பொதுமக்கள் இணையம் மூலம் தங்களுக்குள் கடன் அளித்துக்கொள்ளும் சேவை மேலும் பிரபலமாக வாய்ப்புள்ளது. 

கைபேசி மூலம் கடன் வசதி அளிக்கும் செயலிகளும் பிரபலமாகும் என எதிர்பார்க்கலாம். ஆவணங்களை டிஜிட்டல் மயமாக்குவதும் அதிகமாகலாம்.

...
மொழியில் கவனம்

மொழியில் கவனம்...

10/01/2018

இணையத்தைப் பொறுத்தவரை அடுத்த 100 கோடிப் பயனாளிகள் மீதுதான் நிறுவனங்களின் கவனம் இருக்கும். குறிப்பாக, இந்தக் கவனம் இந்தியா உள்பட பல நாடுகளைச் சேர்ந்த பயனாளிகள் மீது இருக்க வாய்ப்புகள் அதிகம். எனவே, இந்தப் புதிய பயனாளிகளைக் கவர்வதில் நிறுவனங்கள், சேவைகளை உருவாக்குபவர்கள் கவனம் செலுத்தக்கூடும். 

இதில் நிகழக்கூடிய முக்கிய மாற்றம் மொழி சார்ந்ததாக இருக்கும். ஏனெனில், இதுவரை இணையம் என்பது பிரதானமாக ஆங்கிலம் தெரிந்தவர்கள் பயன்படுத்தும் நுட்பமாக இருக்கிறது.

ஆனால், புதிய பயனாளிகள் ஆங்கிலம் அல்லாமல் தங்கள் தாய்மொழியில் இணையத்தைப் பயன்படுத்த விரும்புகிறவர்களாக இருப்பார்கள். இவர்கள் பெரும்பாலும் செல்போன்கள் வாயிலாகவே இணையத்தில் நுழைய வாய்ப்புள்ளது. இதன் விளைவாக செல்போன்களின் இயங்குதளம், உள்ளீ ட்டுக்கான விசைப்பலகை ஆகியவை உள்ளூர் மொழிகளில் அமைய அதிகம் வாய்ப்புள்ளது. எல்லாவற்றிலும் மொழியாக்க சேவைகள் வரலாம். குரல்வழி சேவைகளும் தீவிரமாகும். கடைக்கோடி மக்களையும் சென்றடையக்கூடிய சேவைகளை உருவாக்குவதில் மென்பொருளாளர்கள் ஆர்வம் காட்டுவார்கள்.

...
செயற்கை நுண்ணறிவு

செயற்கை நுண்ணறிவு...

10/01/2018

ஏ.ஐ. எனப்படும் ‘செயற்கை நுண்ணறிவு’ இனியும் அறிவியல் புனைகதையில் மட்டுமே சாத்தியமாகக்கூடிய விஷயம் என்ற நிலை மாறிவிட்டது. இந்தத் துறையில் ஆய்வுகள் தீவிரமாக நடைபெற்றுவருவதோடு, இந்த நுட்பம் சார்ந்த சோதனை வடிவிலான சேவைகளும் அறிமுகமாகிக்கொண்டிருக்கின்றன. குறிப்பாக ‘இயந்திரக் கற்றல்’ எனச் சொல்லப்படும் நுட்பம் சார்ந்த சேவைகள் பிரபலமாகி வருகின்றன. 

அரட்டை மென்பொருள்கள் தொடங்கி பலவிதமான சேவைகளில் இவற்றின் தாக்கத்தைப் பார்க்கலாம். வரும் ஆண்டு, இந்த நுட்பம் பொதுமக்களுக்கு மேலும் நெருக்கமாக வாய்ப்புள்ளது. ரோபோக்கள் பரப்பிலும் நிறைய புதுமைகளையும் மாற்றங்களையும் எதிர்கொள்ளலாம்.

...
இணையத் தாக்குதல்

இணையத் தாக்குதல்...

10/01/2018

இணையத்தில் இணைபவர்களும் இணையத்துடன் இணைக்கப்பட்ட பொருட்களும் அதிகரித்துவரும் நிலையில், இணையம் வழியான தாக்குதலும் அதிகரிக்கும் அபாயம் உள்ளது. 

கடந்த ஆண்டு ரான்சம்வேர் தாக்குதல் ஏற்படுத்திய நிலையில், இந்த ஆண்டும் ஹேக்கர்களின் கைவரிசையை எதிர்பார்க்கலாம். இணையத் தாக்குதல் தவிர, தரவுகள் திருட்டும் அதிகரிக்கலாம். இந்த விஷயத்தில் நிறுவனங்களும் எச்சரிக்கையாக இருக்க வேண்டும். 

தனி மனிதர்களும் விழிப்புடன் இருக்க வேண்டும். அடிப்படை கடவுச்சொல் பாதுகாப்பில் கூடுதல் கவனம் செலுத்துவது நல்லது.

...
தானியங்கி கார்கள்

தானியங்கி கார்கள்...

10/01/2018

தானியங்கி கார்கள் எனச் சொல்லப்படும் டிரைவர் இல்லாமல் மென்பொருள் மூலம் இயங்கும் கார்கள் தொடர்பான ஆய்வு இந்த ஆண்டு மேலும் தீவிரமாகலாம். கூகுள், ஆப்பிள், டெஸ்லா எனப் பல நிறுவனங்கள் இதில் ஆர்வம் காட்டிவருகின்றன. இந்தியாவில் பல முன்னணி நிறுவனங்கள் இந்தப் பிரிவில் கவனத்தைத் திருப்பியுள்ளன.

 

...
புதுமை விவேக  கைபேசிகள்

புதுமை விவேக கைபேசிகள்...

10/01/2018

இந்த ஆண்டு ஸ்மார்ட் போன் உலகில் பல புதிய அறிமுகங்களை எதிர்பார்க்கலாம். செயற்கை நுண்ணறிவு உதவியுடன் செயல்படும் மேம்பட்ட கேமராக்களை நிறுவனங்கள் அறிமுகம் செய்யத் தயாராகின்றன. ‘போர்டபிள் ஸ்மார்ட்போன்’ என சொல்லப்படும், மடித்து வைக்கக்கூடிய திரைகள் கொண்ட போன்கள் அறிமுகமாகலாம். சாம்சுங், மைக்ரோசாப்ட் போன்ற நிறுவனங்கள் இதில் தீவிரமாக உள்ளன. மொபைல் சிப் ஆற்றலும் அதிகரிக்கும்.

 

...
பிட்காயின் மாயம்

பிட்காயின் மாயம்...

10/01/2018

கடந்த ஆண்டு தொடக்கத்தில் பிட்காயின் பற்றித் தெரியாதவர்கள் அநேகர். ஆனால், 2017இல் ஒரு பிட்காயினின் மதிப்பு, பத்தாயிரம் டாலர்களைக் கடந்து உச்சத்தைத் தொட்ட பின்னர், இந்த 'இணைய நாணயம்' பிரபலமாகிவிட்டது. சில ஆண்டுகளுக்கு முன் பிட்காயின் வாங்கி வைத்தவர்கள், இப்போது கோடீஸ்வரர்கள் என்று சொல்லப்படுவதும் பிட்காயின் மீதான ஈர்ப்பை அதிகமாக்கியிருக்கிறது.

சரி, இந்த ஆண்டு பிட்காயின் மதிப்பு எப்படி இருக்கும், ஏறுமா, இறங்குமா? 'கிரிப்டோ கரன்ஸி' எனப்படும் எண்ம நாணய வகையைச் சேர்ந்த பிட்காயினின் அடிப்படை மீது நம்பிக்கை கொண்டவர்கள் பிட்காயின் மதிப்பு உயரும் என்றே சொல்கின்றனர். அயர்லாந்து பிளாக்செயின் சங்கத்தின் தலைவர் ருபேன் காட்பிரே அடுத்த சில ஆண்டுகளில் பிட்காயின் மதிப்பு 2 லட்சம் டாலர்களைத் தொடும் என்று ஆரூடம் கூறியிருக்கிறார்.

இன்னொரு புறம், இது அங்கீகரிக்கப்படாத நாணயம் என்று இதன் பாதகமான அம்சங்களைச் சொல்பவர்கள், பிட்காயின் காற்றுப்போன பலூனாகும் என எச்சரிக்கின்றனர். ஆனால், ஒன்று நிச்சயம், பிட்காயினின் ஆதார பலமாகக் கருதப்படும் ‘பிளாக்செயின் நுட்பம்’ இந்த ஆண்டும் அதிகமாகக் கவனத்தை ஈர்க்க வாய்ப்பிருக்கிறது. பிட்காயின் பரிவர்த்தனைகள் அனைத்தும், அதன் உறுப்பினர்கள் அனைவராலும் பராமரிக்கப்படும்போது, லெட்ஜர் முழுவதும் அப்டேட் செய்யப்படுவதைத்தான் பிளாக்செயின் என்கின்றனர். இந்த அடிப்படை நுட்பத்தை வங்கிகளும் நிதி அமைப்புகளும் ஏற்கெனவே தீவிரமாக ஆய்வுசெய்துவரும் நிலையில், மருத்துவம் உள்ளிட்ட துறைகளில் இது பயன்படுத்தப்பட வாய்ப்பிருக்கிறது என்றும் கூறுகின்றனர்.

எனவே, பிட்காயின் போக்கு மீதும் முக்கியமாக பிளாக்செயின் நுட்பம் மீதும் ஒரு கண் வைத்திருக்கலாம். பிட்காயின் மட்டுமல்ல, ஈதர், லைட்காயின் உள்ளிட்ட மாற்று எண்ம நாணயங்களும் தலைப்புச்செய்தியில் அடிக்கடி அடிபடலாம்.

 

...
5ஜி நுட்பம்

5ஜி நுட்பம்...

10/01/2018

தொலைத்தொடர்புத் துறையைப் பொறுத்தவரை கடந்த ஆண்டு சோதனையான ஆண்டுதான். இந்தத் துறையில் பெரும் போட்டி ஏற்பட்டு, பெரிய நிறுவனங்கள் மட்டுமே தாக்குப்பிடிக்க முடியும் எனும் நிலை உருவாகியிருக்கிறது. 

இது நுகர்வோருக்கு எந்த அளவு நல்லது எனத் தெரியவில்லை. ஆனால், தொழில்நுட்ப நோக்கில் பார்த்தால், இந்த ஆண்டு 5ஜி நுட்பம் மீதான கவனம் அதிகமாக வாய்ப்புள்ளது. ஏற்கெனவே 3ஜியிலிருந்து 4ஜிக்கு மாறியுள்ள நிலையில், 5ஜிக்கான பாய்ச்சலுக்கு உலகம் காத்திருக்கிறது. 

5ஜி நுட்பத்தில் இணையம் பத்து மடங்கு வேகத்தில் உள்ளங்கையில் வந்து சேரும். இதற்கான பிரத்தியேக போன்களும் சேவைகளும் உருவாகலாம். இதற்கான தயாரிப்புப் பணிகள் இந்த ஆண்டு தீவிரமாக வாய்ப்புள்ளது. இணைய ஸ்ட்ரீமிங், வீடியோ கேம் விளையாட்டு, ஆக்மண்டெட் ரியாலிட்டி போன்ற கருத்தாக்கங்கள் இன்னும் பரவலாக வாய்ப்புள்ளது.

...