ஃப்ளாஷ் நியூஸ்

    ஸ்பெயின் லா லீகா பட்டத்தை 25ஆவது முறையாக வென்றது பார்சிலோனா...

    ஸ்பெயின் லா லீகா பட்டத்தை 25ஆவது முறையாக வென்றது பார்சிலோனா

    02/05/2018

    கொருனா, மே.1: ஸ்பெயின் லா லீகா கால்பந்துப் போட்டியில் பார்சிலோனா 25 ஆவது முறையாக லீக் பட்டத்தை வென்று சாதனைப் படைத்துள்ளது. ஞாயிற்றுக்கிழமை நடைபெற்ற லீக் ஆட்டத்தில் பார்சிலோனா 4 - 2 என்ற கோல்களில் டெப்போர்த்திவோ லா கொருனா அணியை வென்றது.

    இந்த ஆட்டத்தில் பார்சிலோனாவின் உச்ச நட்சத்திரம் லியோனெல் மெஸ்சி மூன்று கோல்களைப் போட்டு அதிரடி படைத்தார். சமநிலை கண்டால் கூட ஸ்பெயின் லீக் பட்டத்தை வெல்ல முடியும் என்ற நிலையில் பார்சிலோனா ஆட்டத்தைத் தொடங்கியது. முதல் பாதி ஆட்டத்தில் பிலிப்பே கோத்தினோ, லியோனெல் மெஸ்சி போட்ட கோல்களின் வழி பார்சிலோனா 2 -0 என்ற கோல்களில் முன்னணிக்கு சென்றது.

    முதல் பாதி ஆட்டம் முடிவடையும் தறுவாயில் லுக்காஸ் பேரேஸ், டெப்போர்த்திவோ அணியின் ஒரே கோலைப் போட்டார். 64 ஆவது நிமிடத்தில் எம்ரே கோலாக் ஆட்டத்தை சமப்படுத்தினார்.  82 ஆவது நிமிடத்தில் மெஸ்சி போட்ட கோலின் வழி பார்சிலோனா மீண்டும் முன்னணிக்குச் சென்றது.

    ஆட்டத்தின் இறுதி நிமிடங்களில் மெஸ்சி போட்ட நான்காவது கோல் , பார்சிலோனாவின் வெற்றியை உறுதிச் செய்தது. 34 ஆட்டங்களில் 86 புள்ளிகளுடன் பார்சிலோனா தனது முதலிடத்தை உறுதிச் செய்தது. அதோடு எட்டாவது முறையாக ஒரே பருவத்தில் லா லீகா, கோப்பா டெல் ரே கிண்ணங்களை வென்று சாதனைப் படைத்துள்ளது.

    ...

    சாதனைகளைத் தகர்த்தெறிகிறது மென்செஸ்டர் சிட்டி

    சாதனைகளைத் தகர்த்தெறிகிறது மென்செஸ்டர் சிட்டி...

    02/05/2018

    லண்டன், மே.1: இங்கிலீஷ் பிரீமியர் லீக் வெற்றியாளரான மென்செஸ்டர் சிட்டி, தொடர்ந்து பல்வேறு சாதனைகளைப் படைத்து வருகிறது. ஞாயிற்றுக்கிழமை நடந்த லீக் ஆட்டத்தில் மென்செஸ்டர் சிட்டி 4 - 1 என்ற கோல்களில் வெஸ்ட்ஹேம் யுனைடெட் அணியை வீழ்த்தியது.

    இந்த ஆட்டத்தில் வெற்றி பெற்றதன் மூலம், மென்செஸ்டர் சிட்டி 35 லீக் ஆட்டங்களில் 102 கோல்களை மிக விரைவாகப் போட்ட அணி என்ற பெருமையைப் பெற்றுள்ளது. 1931/32 ஆம் பருவத்தில் எவெர்டன் ஏற்படுத்திய சாதனையை சமப்படுத்தியுள்ளது.

    அடுத்து வரும் ஆட்டத்தில் இரண்டு கோல்களைப் போடுவதன் வழி, பிரீமியர் லீக்கில் அதிக கோல்கள் போட்ட அணி என்ற பெருமையை மென்செஸ்டர் சிட்டி பெறும். இதற்கு முன்னர் 2004/05 ஆம் பருவத்தில் பிரீமியர் லீக் பட்டத்தை வென்ற செல்சி 103 கோல்களைப் போட்டது.

    தற்போது மென்செஸ்டர் சிட்டி அந்த சாதனையை முறியடிக்க விருக்கிறது. வெஸ்ட்ஹேம் யுனைடெட்டுக்கு எதிரான ஆட்டத்தில் மென்செஸ்டர் சிட்டியின் முதல் கோலை லெரோய் சானே போட்டார். வெஸ்ட்ஹேம் ஆட்டக்காரர் பப்லோ சபாலேத்தா போட்ட சொந்த கோலினால் மென்செஸ்டர் சிட்டி 2 -0 என்ற கோல்களில் முன்னணிக்குச் சென்றது. 

    42ஆவது நிமிடத்தில் ஏரோன் கிரேஸ்வேல் மூலம் வெஸ்ட்ஹேம் யுனைடெட் ஒரு கோலைப் போட்டிருந்தாலும் இரண்டாம் பாதியில் பெர்னான்டிண்ஹோ, கேப்ரியல் ஜீசஸ் போட்ட கோல்கள் மென்செஸ்டர் சிட்டியின் வெற்றியை உறுதிச் செய்தன. 

    ...
    பெலாய்னியின் கடைசி நிமிட கோலில்  மென்செஸ்டர் யுனைடெட் வெற்றி

    பெலாய்னியின் கடைசி நிமிட கோலில் மென்செஸ்டர் யுனைடெட் வெற்றி...

    02/05/2018

    மென்செஸ்டர், மே.1: இங்கிலீஷ் பிரீமியர் லீக் கால்பந்துப் போட்டியில் ஞாயிற்றுக்கிழமை ஓல்ட் டிரப்போர்ட் அரங்கில் நடைபெற்ற ஆட்டத்தில் மென்செஸ்டர் யுனைடெட்  2 -  1  என்ற கோல்களில் அர்செனலை வீழ்த்தியது.

    இந்த பருவத்தின் இறுதியில் அர்செனல் நிர்வாகி பொறுப்பில் இருந்து ஓய்வு பெறவிருக்கும் ஆர்சன் வெங்கர் , கடைசி முறையாக ஓல்ட் டிரப்போர்ட் அரங்கில் தனது அணியை களமிறக்கினார். ஓல்ட் டிரப்போர்ட்டில் பல்வேறு சுவாரசியமான அனுபவங்களைச் சந்தித்துள்ள வெங்கருக்கு , மென்செஸ்டர் யுனைடெட்டுக்கு எதிரான கடைசி ஆட்டம் தோல்வியில் முடிந்துள்ளது.

    ஆட்டம் தொடங்குவதற்கு முன்னதாக, ஆர்சன் வெங்கரை எப்போதும் ஏளனம் செய்து வந்த மென்செஸ்டர் யுனைடெட் ரசிகர்கள், எழுந்து நின்று கரவொலி எழுப்பி தங்களின் ஆதரவை வெளிப்படுத்தினர்.

    அதேவேளையில் மென்செஸ்டர் யுனைடெட்டின் முன்னாள் நிர்வாகி சிர் அலெக்ஸ் பெர்கூசன், வெங்கருக்கு நினைவுச் சின்னம் வழங்கியபோது மொரின்ஹோவும் அந்த தருணத்தில் ஆர்சன் வெங்கருடன் கை குலுக்க, ஓல்ட் டிரப்போர்ட் அரங்கமே அதிர்ந்தது. விறுவிறுப்பாக நடைபெற்ற ஆட்டத்தில் மென்செஸ்டர் யுனைடெட்டின் முதல் கோலைப் போல் பொக்பா அடித்தார்.

    எனினும், இரண்டாம் பாதியில் ஹென்ரிக் மிக்கிதரியன் போட்ட கோலின் மூலம் அர்செனல் ஆட்டத்தை சமப்படுத்தியது. ஆட்டம் சமநிலையில் முடியும் என எதிர்பார்க்கப்பட்ட வேளையில் மரோன் பெலாய்னி போட்ட கோல், அர்செனலை தோல்வியுறச் செய்தது. இந்த வெற்றியின் வழி மென்செஸ்டர் யுனைடெட் அடுத்த பருவத்துக்கான சாம்பியன்ஸ் லீக் போட்டியில் தனது இடத்தை உறுதிச் செய்துள்ளது. அதேவேளையில் அர்செனல் லீக் போட்டியை ஆறாவது இடத்தில் முடிக்கவிருக்கிறது.

    ...
    இங்கிலீஷ் பிரீமியர் லீக்:  3ஆவது இடத்தை தக்க வைக்க லிவர்பூல் போராட்டம்

    இங்கிலீஷ் பிரீமியர் லீக்: 3ஆவது இடத்தை தக்க வைக்க லிவர்பூல் போராட்டம்...

    30/04/2018

    லிவர்பூல், ஏப்.30:

    இங்கிலீஷ் பிரீமியர் லீக் கால்பந்துப் போட்டியில் மூன்றாவது இடத்தைப் பிடிப்பதில் லிவர்பூல் கடும் போரட்டம் நடத்த வேண்டியுள்ளது. ஐரோப்பிய வெற்றியாளர் லீக் கிண்ண கால்பந்துப் போட்டியில் அதிரடி படைத்து வரும் லிவர்பூல் பிரீமியர் லீக்கில் கடந்த இரண்டு ஆட்டங்களில் சமநிலை கண்டு அதன் ரசிகர்களுக்கு ஏமாற்றம் அளித்துள்ளது.

    பிரீமியர் லீக் போட்டியில் இரண்டாவது இடத்தைப் பிடிக்க மென்செஸ்டர் யுனைடெட்டுக்கு நெருக்குதல் கொடுக்கும் என எதிர்பார்க்கப்பட்ட லிவர்பூல் தற்போது தனது நான்காவது இடத்தை தக்க வைக்க போராட்டம் நடத்தி வருகிறது. சனிக்கிழமை அன்பீல்ட் அரங்கில் நடந்த பிரீமியர் லீக் ஆட்டத்தில் லிவர்பூல் கோல் ஏதுமின்றி ஸ்டோக் சிட்டியுடன் சமநிலைக் கண்டது.

    கடந்த புதன்கிழமை சாம்பியன்ஸ் லீக் ஆட்டத்தின் அரையிறுதி ஆட்டத்தில் ஐந்து கோல்களில் ஏ.எஸ் ரோமாவை வீழ்த்திய லிவர்பூல் அதே வேகத்தை பிரீமியர் லீக் போட்டியிலும் வெளிப்படுத்தும் என எதிர்பார்க்கப்பட்டது. எனினும் லிவர்பூல் அணியின் தொடர் தாக்குதல்களை தடுத்து நிறுத்துவதில் ஸ்டோக் சிட்டி தற்காப்பு அரண் வெற்றி பெற்றது.  

    அதேவேளையில் டானி இங்ஸ் போட்ட கோலையும் ஒப்சைட் காரணமாக நடுவர் நிராகரித்தார். இந்த சமநிலை முடிவை அடுத்து பிரீமியர் லீக் வெற்றியாளர் மென்செஸ்டர் சிட்டியைத் தவிர்த்து அடுத்த மூன்று இடங்களைப் பெறுவதில் மென்செஸ்டர் யுனைடெட், லிவர்பூல், டோட்டேன்ஹம் ஹோட்ஸ்பர், செல்சி அணிகளுக்கு இடையில் வெளிப்படையான போட்டி நிலவுகிறது. இன்னும் இரண்டு ஆட்டங்களே எஞ்சியுள்ள வேளையில் லிவர்பூல், செல்சியையும், பிரைடன் அல்பியோன் அணியையும் எதிர்கொள்ள விருக்கிறது.

    ...
    மீண்டும் ஏமாற மலேசிய கால்பந்து சங்கம் தயாராக இல்லை: டத்தோ முஹமட் யூசோப் மஹாடி

    மீண்டும் ஏமாற மலேசிய கால்பந்து சங்கம் தயாராக இல்லை: டத்தோ முஹமட் யூசோப் மஹாடி...

    30/04/2018

    கோலாலம்பூர், ஏப்.30: மலேசிய லீக் கிண்ண கால்பந்துப் போட்டியில் சில அணிகள் வழங்கக் கூடிய வெற்று வாக்குறுதிகளை நம்பி, மலேசிய கால்பந்து சங்கம் இனியும் ஏமாற்றம் அடையத் தயாராக இல்லை என அதன் இடைக்காலத் தலைவர் டத்தோ முஹமட் யூசோப் மஹாடி தெரிவித்தார். இந்த ஆண்டுக்கான மலேசிய லீக் கால்பந்துப் போட்டியில் குவாந்தான் எப்.ஏ வழங்கிய வாக்குறுதிகளில் மலேசிய கால்பந்து சங்கம் ஏமாற்றம் அடைந்திருப்பதாக யூசோப் மஹாடி தெரிவித்தார். ஆட்டக்காரர்களின் சம்பளப் பிரச்சினையைத் தீர்த்து விடுவதாக குவாந்தான் எப்.ஏ வாக்குறுதி வழங்கி இருந்தது.

    ஆனால் அந்த பிரச்சினை இன்று வரை தீர்க்கப்படவில்லை. மலேசிய லீக் கால்பந்துப் போட்டி தொடங்கும் முன்னர் அதில் பங்கேற்கும் அணிகள் தங்களை சூழ்ந்துள்ள பிரச்சினைகளைத் தீர்த்து விடுவதாக கூறுகின்றன. ஆனால் சம்பந்தப்பட்ட அணிகள் கொடுத்த வாக்குறுதிகளை நிறைவேற்றுவதில்லை என அவர் சொன்னார்.

    இனி வரும் காலங்களில் சம்பந்தப்பட்ட அணிகளின் இனிப்பு வார்த்தைகளில் ஏமாற்றம் அடையப் போவதில்லை என முஹமட் யூசோப் மஹாடி தீர்க்கமாக தெரிவித்துள்ளார். ஆட்டக்காரர்களின் சம்பளப் பிரச்சினையைத் தீர்க்காத குவாந்தான் எப்.ஏ அணி இப்பருவத்துக்கான மலேசிய லீக் போட்டியில் இருந்து நீக்கப்பட்டுள்ளது. அதேவேளையில் அந்த அணி முதலில் பங்கேற்ற 7 ஆட்டங்களின் முடிவுகளும் ரத்து செய்யப்பட்டுள்ளன.

    ...
    பிரீமியர் லீக்: லெய்செஸ்டரை பந்தாடியது கிறிஸ்டல் பேலஸ்

    பிரீமியர் லீக்: லெய்செஸ்டரை பந்தாடியது கிறிஸ்டல் பேலஸ்...

    30/04/2018

    லண்டன், ஏப்.30: இங்கிலீஷ் பிரீமியர் லீக் கால்பந்துப் போட்டியில் சனிக்கிழமை நடந்த ஆட்டத்தில் கிறிஸ்டல் பேலஸ் , 5 - 0  என்ற கோல்களில் லெய்செஸ்டர் சிட்டியை வீழ்த்தியது.  இந்த வெற்றியின் மூலம் பிரீமியர் லீக் போட்டியில் இருந்து தகுதி இறக்கம் காணும் நிலையில் இருந்து கிறிஸ்டல் பேலஸ் தப்பித்துள்ளது.

    1972ஆம் ஆண்டுக்குப் பிறகு கிறிஸ்டல் பேலஸ், பிரீமியர் லீக் போட்டியில் மிகப் பெரிய வெற்றியைப் பதிவு செய்துள்ளது. ஆக கடைசியாக 1972 ஆம் ஆண்டில் கிறிஸ்டல் பேலஸ், 5 - 0  என்ற கோல்களில் மென்செஸ்டர் யுனைடெட்டை வீழ்த்தியது அந்த கிளப்பின் வரலாற்றில் மிகப் பெரிய வெற்றியாக பதிவு செய்யப்பட்டிருந்தது. இந்நிலையில் சனிக்கிழமை வில்பிரேட் சஹா, கிறிஸ்டல் பேலசின் கோல் வேட்டையைத் தொடக்கி வைத்தார்.  17 ஆவது நிமிடத்தில் முதல் கோலைப் போட்ட சஹா, 38 ஆவது நிமிடத்தில் மக்கார்த்தர் இரண்டாவது கோலைப் போடுவதற்கு காரணமாக இருந்தார்.

    இரண்டாம் பாதி ஆட்டத்தின் 56 ஆவது நிமிடத்தில் லெய்செஸ்டர் சிட்டி ஆட்டக்காரர் மார்க் ஆல்பிரைடனுக்கு சிவப்பு அட்டை கொடுக்கப்பட்டது. இந்த வாய்ப்பை நன்கு பயன்படுத்திக் கொண்ட,  கிறிஸ்டல் பேலஸ் மேலும் மூன்று கோல்களைப் போட்டது. 81 ஆவது நிமிடத்தில் லொப்டஸ் சீக், 84ஆவது நிமிடத்தில் பாட்ரீக் வான் ஹோல்ட், 90 ஆவது நிமிடத்தில் கிறிஸ்டியன் பெந்தேக்கே அந்த மூன்று கோல்களையும் போட்டனர். இந்த வெற்றியின் மூலம் 38 புள்ளிகளுடன் கிறிஸ்டல் பேலஸ் பட்டியலில் 11 ஆவது இடத்துக்கு முன்னேறியுள்ளது.

    ...
    ஸ்காட்லாந்தின் ரேஞ்சர்ஸ் கிளப்பின்  நிர்வாகி பொறுப்பை ஏற்கிறார் ஜெராட்

    ஸ்காட்லாந்தின் ரேஞ்சர்ஸ் கிளப்பின் நிர்வாகி பொறுப்பை ஏற்கிறார் ஜெராட்...

    30/04/2018

    லண்டன், ஏப்.30: லிவர்பூல் கால்பந்து கிளப்பின் சகாப்தம் ஸ்டீவன் ஜெராட், ஸ்காட்லாந்தின் ரேஞ்சர்ஸ் கால்பந்து கிளப்பின் நிர்வாகி பொறுப்பை ஏற்கவிருப்பதாக செய்திகள் வெளியாகி இருக்கின்றன.

    இதன் தொடர்பில் ஸ்டீவன் ஜெராட், ரேஞ்சர்ஸ் கிளப்பின் பிரதிநிதிகளுடன் மேலும் பேச்சுகளைத் தொடர்ந்து வருவதாக ஈ.எஸ்.பி.என் செய்தி நிறுவனம் தெரிவித்துள்ளது.  ஜெராட்டை நிர்வாகியாக நியமனம் செய்வதில் ரேஞ்சர்ஸ் நம்பிக்கையுடன் உள்ளது. ஜெராட்டுக்கு 4 ஆண்டுகளுக்கான ஒப்பந்தத்தை வழங்கவும் ரேஞ்சர்ஸ் தயாராக இருப்பதாக கூறப்படுகிறது.

    ஜெராட் தற்போது லிவர்பூல் கிளப்பின் 18 வயதுக்கு உட்பட்ட அணியை வழி நடத்துகிறார். அடுத்த வார தொடக்கத்தில் ரேஞ்சர்ஸ், ஜெராட்டை  தங்களின் நிர்வாகியாக அறிவிக்கக்கூடும் என எதிர்பார்க்கப்படுகிறது. அதேவேளையில் லிவர்பூலின் முன்னாள் ஆட்டக்காரர் கேரி மெக்கலிஸ்தார். அவருடன் துணை நிர்வாகி பொறுப்பை ஏற்பார் என கூறப்படுகிறது.

    ...
    ஆசிய பூப்பந்துப் போட்டி: அரையிறுதியில் சோங் வெய் தோல்வி

    ஆசிய பூப்பந்துப் போட்டி: அரையிறுதியில் சோங் வெய் தோல்வி...

    30/04/2018

    வூஹன், ஏப்.30: சீனாவில் நடைபெற்று வரும் 2018 ஆசிய பூப்பந்துப் போட்டியின் ஆடவர் ஒற்றையர் பிரிவில் தேசிய பூப்பந்து வீரர் டத்தோ லீ சோங் வெய் தோல்வி கண்டுள்ளார். சனிக்கிழமை நடந்த ஆட்டத்தில் சோங் வெய் ஜப்பானில் இளம் ஆட்டக்காரர் கெந்தோ மொமோத்தாவை எதிர்கொண்டார்.

    இந்த ஆட்டத்தில் சோங் வெய்,  19-21, 14-21 என்ற புள்ளிகளில் தோல்வி கண்டார்.  55 நிமிடங்கள் நீடித்த இந்த ஆட்டத்தில் சோங் வெய்யின் தோல்வி எதிர்பார்த்த ஒன்றுதான் என மலேசிய பூப்பந்து சங்கத் தலைவர் டத்தோ ஶ்ரீ நோர்சா சக்காரியா தெரிவித்துள்ளார்.  சீனாவின் ஷீ யூக்கீ,  தைவானின் சொவ் தியேன் சென் போன்ற ஆட்டக்காரர்களை வீழ்த்திய கெந்தோ மொமோத்தா தான் ஒரு பலம் வாய்ந்த ஆட்டக்காரர் என்பதை நிரூபித்துள்ளார் என சக்காரியா தெரிவித்தார். 

    மொமொத்தாவுக்கு தடை விதிக்கப்படும் முன்னர் அவர் உலகின் இரண்டாம் நிலை ஆட்டக்காரராக இருந்தார் என்பது குறிப்பிடத்தக்கது.  டென்மார்க்கின் விக்டர் அக்செல்சன், கெந்தோ மொமோத்தா போன்ற ஆட்டக்காரர்கள் அடுத்து வரும் 10 ஆண்டுகளில் உலக பூப்பந்து அரங்கில் ஆதிக்கம் செலுத்தக்கூடிய ஆட்டக்காரர்கள் என நோர்சா சக்காரியா கூறினார்.

    இதற்கு முன்னர் 2006, 2016ஆம் ஆண்டுகளில் ஆசிய பூப்பந்து வெற்றியாளராக வாகை சூடிய சோங் வெய் மூன்றாவது முறையாக வெற்றியாளர் பட்டத்தை வெல்ல இலக்குக் கொண்டிருந்தார். எனினும் அவரின் எண்ணம் ஈடேறவில்லை. முதல் முறையாக கெந்தோ மொத்தோவிடம் சோங் வெய் தோல்வி கண்டுள்ளார்.

    ...
    பிரேசில் கால்பந்து சங்கத் தலைவருக்கு ஆயுட் காலத் தடை

    பிரேசில் கால்பந்து சங்கத் தலைவருக்கு ஆயுட் காலத் தடை...

    30/04/2018

    சூரிக், ஏப்.29: பிரேசில் கால்பந்து சங்கத் தலைவர் மார்க்கோ போலோ டெல் நேரோவுக்கு ஆயுட்காலத் தடை விதிக்கப்படுவதாக ஃபீபா எனப்படும் அனைத்துலக கால்பந்து சம்மேளனம் அறிவித்துள்ளது. 

    ஊழல் விவகாரத்தின் காரணமாக அவருக்கு இந்த தடை விதிக்கப்படுவதாக ஃபீபா அறிவித்துள்ளது. பிரேசில் கால்பந்து சங்கத் தலைவராக தமது அதிகாரத்தைப் பயன்படுத்தி ஊடக நிறுவனங்களுக்கு ஒப்பந்தங்களையும் வர்த்தக உரிமைகளையும் வழங்கியதாக அவர் மீது குற்றஞ்சாட்டப்பட்டுள்ளது. 

    இதன் வழி அவர் ஊழலில் ஈடுபட்டது நிரூபிக்கப்பட்டுள்ளதாக ஃபீபாவின் ஒழுங்குக் குழு அறிவித்துள்ளது.  எனினும் தாம் அத்தகையை நடவடிக்கைகளில் ஈடுபடவில்லை என ஃபீபாவின் முன்னாள் நிர்வாக உறுப்பினருமான டெல் நேரோ தெரிவித்துள்ளார்.

    2015 ஆம் ஆண்டில் ஊழல் நடவடிக்கைகளில் ஈடுபட்டவர்கள் மீது அமெரிக்க அமலாக்கத் தரப்பு விசாரணை மேற்கொண்டவர்களில் டெல் நேரோவும் ஒருவர்.

    ...
    வெங்கருடன் சண்டையிட்டதை எண்ணி வருந்துகிறேன்: மொரின்ஹோ

    வெங்கருடன் சண்டையிட்டதை எண்ணி வருந்துகிறேன்: மொரின்ஹோ...

    30/04/2018

    மென்செஸ்டர், ஏப்.29: கடந்த சில ஆண்டுகளில் அர்செனல் நிர்வாகி, ஆர்சன் வெங்கருடன் கருத்து வேறுபாடு கொண்டதை எண்ணி தாம் வருந்துவதாக மென்செஸ்டர் யுனைடெட்  ஜோசே மொரின்ஹோ தெரிவித்துள்ளார்.

    இந்தப் பருவத்தின் இறுதியில் அர்செனல் நிர்வாகி பொறுப்பில் இருந்து ஆர்சன் வெங்கர் விலகவிருக்கிறார். ஞாயிற்றுக்கிழமை கடைசி முறை, ஆர்சன் வெங்கர், ஓல்ட் டிரப்போர்ட் அரங்கில் அர்செனல் நிர்வாகியாக கால் பதிக்கவுள்ளார். இந்நிலையில் வெள்ளிக்கிழமை செய்தியாளர்களை சந்தித்த மொரின்ஹோ, ஆர்சன் வெங்கருக்கு எதிராக தாம் உதிர்த்த வார்த்தைகளை நினைத்து வருந்துவதாக அவர் சொன்னார்.

    2004 ஆம் ஆண்டில் செல்சி நிர்வாகி பொறுப்பை ஏற்ற பின்னர், மொரின்ஹோ , வெங்கருடன் சிறந்த உறவைக் கொண்டிருந்ததில்லை,. குறிப்பாக வெங்கர் தோல்வி பெறுவதில் வல்லவர் என விமர்சித்திருந்தார்.

    எனினும் அந்த வார்த்தைகளை தாம் பேசியிருக்கக்கூடாது என மொரின்ஹோ தெரிவித்தார். 2004 ஆம் ஆண்டில் அர்செனல் பிரீமியர் லீக் வெற்றியாளராக வாகை சூடியபோது மிகச் சிறந்த அணியைக் கொண்டிருந்தது. அதற்கும் மேலாக தாங்கள் உழைப்பதற்கு அர்செனல் இதர அணிகளுக்கு ஓர் அளவு கோலை நிர்ணயித்திருந்தது என மொரின்ஹோ குறிப்பிட்டார்.

    மென்செஸ்டர் யுனைடெட்  ரசிகர்கள் வெங்கரை எப்போதும் ஏளனம் செய்துள்ளனர். எனினும் வரும் ஞாயிற்றுக்கிழமை மென்செஸ்டர் ரசிகர்கள் வெங்கருக்கு உரிய மரியாதையைக் கொடுக்க வேண்டும் என மொரின்ஹோ கேட்டுக் கொண்டார்.

    ...
    கண்ணீருடன் விடைபெறுகிறார் இனியேஸ்தா

    கண்ணீருடன் விடைபெறுகிறார் இனியேஸ்தா...

    30/04/2018

    பார்சிலோனா, ஏப்.29: பார்சிலோனாவின் மத்திய திடல் ஆட்டக்காரரும் அந்த அணியின் கேப்டனுமாகிய ஆன்ட்ரியஸ் இனியேஸ்தா, இந்த பருவத்தின் இறுதியில் அந்த கிளப்பில் இருந்து வெளியேறப் போவதாக அறிவித்துள்ளார். வெள்ளிக்கிழமை செய்தியாளர்களை சந்தித்த இனியேஸ்தா கண்ணீருடன் அந்த செய்தியை அறிவித்தார்.

    பார்சிலோனாவில் இன்னமும் தாம் பயன்படக்கூடிய ஓர் ஆட்டக்காரராக இருக்கும்போதே அந்த அணியில் இருந்தது விடைபெற நினைத்ததாக 33 வயதுடைய இனியேஸ்தா தெரிவித்தார்.  இனியேஸ்தா, சீனாவில் தமது கால்பந்து வாழ்க்கையைத் தொடருவார் என எதிர்பார்க்கப்படுகிறது.

    எனினும் பார்சிலோனாவுக்கு எதிராக தான் ஒருபோதும் விளையாடப் போவதில்லை என இனியேஸ்தா உறுதியாக தெரிவித்தார். 12 வயதில் பார்சிலோனாவின் லா மசியா கால்பந்து பயிற்சிக் கழகத்தில் இனியேஸ்தா தமது கால்பந்து வாழ்க்கையைத் தொடங்கினார். 

    பார்சிலோனா அணியுடன் நான்கு முறை ஐரோப்பிய வெற்றியாளர் கிண்ணத்தை வென்றுள்ள இனியேஸ்தா, ஸ்பெயினுடன் உலகக் கிண்ணத்தையும் கைப்பற்றியுள்ளார். சனிக்கிழமை நடைபெறவுள்ள டெப்போர்த்திவோ லா கொருனாவுக்கு எதிரான ஆட்டத்தில் ஒரு புள்ளியைப் பெற்றால் பார்சிலோனா இந்த பருவத்துக்கான ஸ்பெயின் லா லீகா பட்டத்தைக் கைப்பற்றும்.

    ...
    உலகக் கிண்ண கால்பந்துப் போட்டிக்குள்  நெய்மார் தயாராகி விடுவார்..

    உலகக் கிண்ண கால்பந்துப் போட்டிக்குள் நெய்மார் தயாராகி விடுவார்.....

    30/04/2018

    ரியோ டி ஜெனிரோ, ஏப்.29: பிரேசில் கால்பந்து நட்சத்திரம் நெய்மார், உலகக் கிண்ண கால்பந்துப் போட்டிக்குள் தயாராகி விடுவார் என அறிவிக்கப்பட்டுள்ளது. கடந்த மார்ச் 3 ஆம் தேதி பிரேசிலின் பெலோ ஹொரிசோந்தே பகுதியில் அறுவைச் சிகிச்சை பெற்ற நெய்மார்,  மே 17 ஆம் தேதி வரை விளையாட முடியாது என அறிவிக்கப்பட்டுள்ளது.

    இந்நிலையில் பாரிஸ் செயின் ஜெர்மைன் அணியின் கடைசி லீக் ஆட்டம் மே 19 ஆம் தேதி நடைபெறவுள்ளது. அந்த ஆட்டத்தில் நெய்மார் பங்கேற்க மாட்டார் என அறிவிக்கப்பட்டுள்ளது.

    எனினும் ஜூன் மாதம் தொடங்கும் உலகக் கிண்ண கால்பந்துப் போட்டிக்கு அவர் தயாராக இருப்பார் என மருத்துவர்கள் அறிவித்துள்ளனர். கடந்த பிப்ரவரி 26 ஆம் தேதி பிரெஞ்சு லீக் போட்டியில் நெய்மார் காயம் அடைந்தார். இதனால், நெய்மாருக்கு பிரேசிலில் அறுவை சிக்கிச்சை மேற்கொள்ளப்பட்டுள்ளது.

    ...
    16 வயதுக்கு உட்பட்ட ஆசிய கால்பந்து சம்மேளன கிண்ணம்:  ஏ பிரிவில் மலேசியா

    16 வயதுக்கு உட்பட்ட ஆசிய கால்பந்து சம்மேளன கிண்ணம்: ஏ பிரிவில் மலேசியா...

    27/04/2018

    கோலாலம்பூர், ஏப்.28: 16 வயதுக்கு உட்பட்ட ஆசிய கால்பந்து சம்மேளனக் கிண்ணப் போட்டியில் மலேசிய அணி ஏ பிரிவில் இடம்பெற்றுள்ளது. இதே பிரிவில் இரண்டு முறை வெற்றியாளரான ஜப்பான், தாய்லாந்து, தஜிகிஸ்தான் ஆகிய நாடுகள் இடம்பெற்றுள்ளன. 

    வரும் செப்டம்பர் 20 ஆம் தேதி தொடங்கி அக்டோபர் 10 ஆம் தேதி வரை போட்டி மலேசியாவில் நடைபெறவுள்ளது. இந்தப் போட்டியின் நடப்பு வெற்றியாளரான ஈராக், டி பிரிவில் இடம்பெற்றுள்ளது. இதே பிரிவில் தென் கொரியா, ஆஸ்திரேலியா, ஆப்கானிஸ்தான் ஆகிய நாடுகள் இடம்பெற்றிருக்கின்றன.  

    பி பிரிவில் வட கொரியா, ஓமான், யேமன், ஜோர்டான் ஆகிய நாடுகள் இடம்பெற்றுள்ள வேளையில், சி பிரிவில் ஈரான், வியட்நாம்., இந்தியா, இந்தோனேசியா ஆகிய அணிகள் இடம் பிடித்துள்ளன. நான்கு ஆண்டுகளுக்கு முன்னால், எஸ். பாலசந்திரன் பயிற்சியின் கீழ் விளையாடிய மலேசியா, காலிறுதி ஆட்டத்தில் ஆஸ்திரேலியாவிடம் தோல்வி கண்டது. 

    அந்த ஆட்டத்தில் வெற்றி பெற்றிருந்தால் மலேசியா, 17 வயதுக்கு உட்பட்ட உலகக் கிண்ண கால்பந்துப் போட்டியில் கலந்து கொண்டிருக்கும். இந்தப் போட்டியின் மூலம் அரையிறுதி ஆட்டம் வரை தகுதிப் பெறும் நான்கு நாடுகள், பெருவில் நடைபெறவுள்ள 17 வயதுக்கு உட்பட்ட உலகக் கிண்ண கால்பந்துப் போட்டிக்கு நேரடியாக தகுதிப் பெறும்.

     

    ...