ஃப்ளாஷ் நியூஸ்

    நாடளாவிய நிலையில் வாக்களிப்பு மையங்கள் மூடப்பட்டன...

    நாடளாவிய நிலையில் வாக்களிப்பு மையங்கள் மூடப்பட்டன

    09/05/2018

    கோலாலம்பூர், மே 9:

    இன்று சரியாக மாலை 5.00 மணிக்கு நாடளாவிய நிலையில் 8,523 வாக்களிப்பு மையங்களும் மூடப்பட்டன. மாலை 5.00 மணிக்கு மேல் யாரும் வாக்களிக்க அனுமதிக்க மாட்டார்கள் என தேர்தல் ஆணையர் டான்ஶ்ரீ ஹசிம் அப்துல்லா தெரிவித்தார். 
     
    காலை 8.00 மணி தொடங்கி 5.00 மணி வரை மட்டுமே வாக்களிப்பு மையங்கள் செயல்பட வேண்டும் என தேர்தல் ஆணைய சட்டம் தெரிவித்துள்ளது. ஆகையால், வாக்காளர்கள் வரிசையில் நின்றிருந்தாலும், 5.00 மணிக்கு மேல் வாக்களிக்க அவர்கள் அனுமதிக்கப்பட மாட்டார்கள். 
     
    வாக்களிக்க முடியாமல் போன வாக்காளர்கள் தங்களின் அதிருப்தியை அறிக்கை வாயிலாக தெரிவிக்கலாம் என்று அவர் செய்தியாளர்களிடம் தெரிவித்தார்.
    ...

    பெக்கானில் வாக்களித்தார் நஜிப்

    பெக்கானில் வாக்களித்தார் நஜிப்...

    09/05/2018

    பெக்கான், மே 9:
    14ஆவது பொதுத் தேர்தலில் வாக்களிக்க மக்கள் கூட்டம் அலைமோதிக் கொண்டிருக்கும் வேளையில், நாட்டின் தலைவர்களும் தங்களின் கடமையை ஆற்ற சொந்த ஊர்களுக்கு பயணித்துள்ளனர்.
     
    அந்த வகையில், டத்தோஶ்ரீ நஜிப் துன் ரசாக் தமது தொகுதியான பெக்கானில் வாக்களித்தார். டத்தோஶ்ரீ நஜிப்புடன் அவரது தாயாரும், துணைவியார் டத்தின்ஶ்ரீ ரோஸ்மா மன்சோரும் வருகை புரிந்தனர். 
     
    இதனிடையே, டத்தோஶ்ரீ நஜிப் வாக்களிப்பு மையத்தில் வாக்கு சீட்டுகளை தவறான பெட்டியில் செலுத்தியதாக புரளிகள் பரப்பப்பட்டன. டத்தோஶ்ரீ நஜிப்பின் டுவிட்டரில், அவர் சட்டமன்ற வாக்கு சீட்டை நாடாளுமன்ற வாக்குப் பெட்டியில் செலுத்துவது போல புகைப்படம் ஒன்று பதிவிடப்பட்டிருந்தது. இதனால், சமூக வலைத்தளவாசிகளிடையே பரபரப்பு ஏற்பட்டது. 
     
    இதுகுறித்த விளக்கம் அளிக்கப்பட்ட போது, அந்தப் படம் புகைப்படக்காரர்களுக்கு 'போஸ்' கொடுக்க மட்டுமே எடுக்கப்பட்டது என்றும், நாட்டின் தலைவருக்கு எந்த வாக்குச் சீட்டை எந்தப் பெட்டியில் போட வேண்டும் என்றும் நன்கு தெரியும் என தெளிவுப்படுத்தப்பட்டது.
    ...
     தெலுங்கு வம்சாவளியினரின் வளர்ச்சிக்கு வழிவகுத்தவர்களை   நன்றியுடன் நினைத்துப் பார்க்கிறோம்!

     தெலுங்கு வம்சாவளியினரின் வளர்ச்சிக்கு வழிவகுத்தவர்களை  நன்றியுடன் நினைத்துப் பார்க்கிறோம்!...

    08/05/2018

    கோலாலம்பூர், மே 8: 

    மலேசிய வாழ் தெலுங்கு வம்சாவளியினருக்கு கடந்த 10 ஆண்டுகள் பொன்னானவையாக அமைய உதவிக்கரம் நீட்டிய அனைத்து நல்லுள்ளம் கொண்ட தலைவர்களையும் நினைத்துப் பார்ப்பதாக மலேசிய தெலுங்கு சங்கத் தேசியத் தலைவர் டத்தோ டாக்டர் அட்சயக்குமார் தெரிவித்தார். 

    நாட்டின் மேம்பாட்டுக்கு தெலுங்கு வம்சாவளியினரின் பங்களிப்பும் அளப்பரியதாக அமைந்ததால்தான், பஞ்சாபி சமூகத்தைத் தொடர்ந்து தெலுங்கு மக்களுக்கு அங்கீகாரம் வழங்கியுள்ளார் டத்தோஶ்ரீ நஜிப் துன் ரசாக். 

    நமது நாட்டில் 60க்கும் மேற்பட்ட தெலுங்கு பள்ளிகள் இருந்தன. ஆனால், காலப் போக்கில் அவை காணாமல் போயின. தெலுங்கு சமூகத்தின் பெருமைகளைக் காப்பாற்ற வேண்டியதன் அவசியத்தை உணர்ந்த டத்தோஶ்ரீ நஜிப் தெலுங்கு மொழியையும் கலை, கலாச்சாரத்தையும் வளர்க்க செடிக் வாயிலாக மானியம் வழங்கினார். அந்த நிதியின் வாயிலாக நாடளாவிய நிலையில் 5 ஆயிரம் முதல் 7ஆயிரம் மாணவர்களுக்கு தெலுங்கு மொழி கற்பிக்கப்பட்டது. 

    ஆகையால் தெலுங்கு சங்கம் டத்தோஶ்ரீ நஜிப் தலைமைத்துவத்திற்கு நன்றி கூற கடமைப்பட்டுள்ளது என அட்சயக்குமார் தெரிவித்தார். 

    இதனிடையே, வரும் பொதுத் தேர்தலில் வாக்களிப்பது அவரவர் உரிமை. யாருக்கு வாக்களிக்க வேண்டும் என கட்டாயப்படுத்த யாருக்கும் உரிமையில்லை. ஆனால், அனைத்து இன மக்களுக்கும் நன்மை புரிபவர்களுக்கு வாய்ப்பளிப்பது சிறந்த தேர்வாக அமையும் என தெலுங்கு சங்கம் கருதுவதாக அவர் செய்தியாளர் சந்திப்பு ஒன்றில் சொன்னார். 

    ...
    வெற்று வாக்குறுதிகளை நம்பி தவறான முடிவுக்கு வராதீர்கள்

    வெற்று வாக்குறுதிகளை நம்பி தவறான முடிவுக்கு வராதீர்கள்...

    08/05/2018

    கோத்தா ராஜா, மே 8:

    'இக்கரை மாட்டுக்கு அக்கரை பச்சை'  என்பது போல எதிர்க்கட்சியின் வாக்குறுதிகள் கேட்பதற்கு இனிமையாக இருக்கலாம். ஆனால் அவை சாத்தியப்படுமா என்பது பெரியக் கேள்விக்குறி. அவர்களின் வெற்று வாக்குறுதிகளை நம்பி மலேசியர்கள் ஏமாற வேண்டாம் என மைபிபிபியின் இடைகால தேசியத் தலைவர் டத்தோஶ்ரீ மெக்லின் டென்னிஸ் கு'குருஸ் தெரிவித்தார். 

    "எதிர்க்கட்சியின் வசமுள்ள மாநிலங்கள் எத்தகைய நிலையில் உள்ளன என்பதை நாம் அனைவரும் அறிவோம். சிலாங்கூரில் டெங்கி காய்ச்சல் பிரச்சினைக்கும் தண்ணீர் பற்றாக்குறைக்கும் விடை காணாமல் இருக்கிறது எதிர்க்கட்சி அரசாங்கம். 

    பினாங்கில் சுரங்கப்பாதை அமைப்பதாகக் கூறி பணத்தை கையாடல் செய்துள்ளது அந்த அரசாங்கம். இவற்றையெல்லாம் நன்கு அறிந்தும், நாட்டின் ஆட்சியை அவர்களிடத்தில் ஒப்படைக்க நினைப்பது அறிவார்ந்த செயலன்று" என்று மெக்லின் எடுத்துக் காட்டினார். 

    மேலும், முன்பு பரம எதிரிகளாக இருந்தவர்கள், தத்தம் சுயநலத்திற்காக ஒன்று கூடியுள்ளனர். ஆட்சியைக் கைப்பற்றும் வரை மட்டுமே அவர்களின் நட்பு நீடிக்கும். அதன் பின்னர், துன் மகாதீருக்கும் அன்வார் குடும்பத்திற்கும் நிச்சயம் பதவி போர் ஏற்படும். 

    நாட்டின் தலைமைத்துவமானது குடும்ப பதவியன்று. நாட்டை நல்ல முறையில் நிர்வகிக்க வேண்டியவர்களுக்கே அந்தப் பதவி வழங்கப்பட வேண்டும். இவற்றையெல்லாம் நன்கறிந்த முன்னாள் பிரதமர் துன் மகாதீரும், எதிர்க்கட்சி கூட்டணியின் மானசீக தலைவர் அன்வார் இப்ராகிமும் பிரதமர் பதவியை குடும்ப சொத்தாக கருதுவது கண்டிக்கத்தக்கது என்றார் அவர். 

    இன்று நண்பகல், கோத்தா ராஜா தொகுதியில் ஒரே மலேசியா கணினி மையம் ஒன்று அதிகாரப்பூர்வமாகத் திறந்து வைக்கப்பட்ட நிகழ்வில் கலந்து கொண்ட டத்தோஶ்ரீ மெக்லின் இவ்வாறு கூறினார். இந்நிகழ்வில் சிறப்பு விருந்தினரான கோத்தா ராஜா நாடாளுமன்றத்திற்கான தேசிய முன்னணி வேட்பாளர் வே.குணாளன் வருகை புரிந்தார். 

    வே.குணாளன் பேசுகையில், தேசிய முன்னணி அரசாங்கம் இந்தியர்களுக்கு வழங்கியுள்ள பங்களிப்புகள் எண்ணில் அடங்கா. ஆனால், எதிர்க்கட்சி வசமுள்ள மாநிலங்களுக்கு அந்த அந்த சலுகைகள் முறையாக சேர்க்கப்படவில்லை. தேமு மக்கல் பிரதிநிதியை மக்கள் தேர்வு செய்தால் மட்டுமே இந்த உதவிகள் அடிமட்ட மக்கள் வரை வந்தடையும் என்றார். 

    அதோடு, சிலாங்கூர் மண்ணின் மைந்தனான தம்மை கோத்தா ராஜா மக்கள் ஏற்றுக் கொள்ள வேண்டும் எனவும் அவர் வேண்டுகோள் விடுத்தார். தம்மை விட எதிர்க்கட்சி பிரதிநிதிகளால் சிறந்த சேவையை ஆற்றிவிடமுடியாது என்றும் அவர் உறுதியாகக் கூறினார். 

    மேலும், கட்சி பேதமைகளை மறந்து, தேசிய முன்னணி குடையின் கீழ் ஒன்றிணைந்து சேவையாற்றும் மைபிபிபி கட்சி உறுப்பினர்களுக்கு அவர் தமது மனமார்ந்த நன்றியைத் தெரிவித்துக் கொண்டார். 

    ...
    சோழன் ஆட்சியை இழந்ததைப்போல, மஇகாவை இழந்து விடாதீர்கள்!

    சோழன் ஆட்சியை இழந்ததைப்போல, மஇகாவை இழந்து விடாதீர்கள்!...

    07/05/2018

    சேரன், சோழன், பாண்டியன் ஆட்சிகளை இழந்து 500 ஆண்டுகளைக் கடந்து விட்டோம். இங்கு வந்து 200 ஆண்டுகளாகக் கட்டமைத்த வாழ்க்கையைத்தான் இன்றும் வாழ்கிறோம். 1957ஆம் ஆண்டு வரை வாழ்ந்த அடிமை தனத்திலிருந்து இந்நாடு விடுதலைப் பெற்றது.

     

    தலைவர்களைக் கடந்து வந்தாலும் ஆட்சியில் இனங்களுக்கு இடையிலான ஒறுமைப்பாடு, சகோதரத்துவம், புரிந்துணர்வு என்கிற கட்டமைப்புகளையும் அதே சமயத்தில் உள்நாட்டுக் குழப்பங்களையும் கட்டங்கட்டமாக சீர்படுத்தப்பட்டுள்ளன. அதேப்போல், டத்தோஸ்ரீ டாக்டர் ச.சுப்பிரமணியம் அவர்களது தலைமைத்துவத்தில் ம.இ.கா வலுப்பெற்று வருவதோடு சமுதாயத்தின் தேவைகளை உணர்ந்து செயலாற்றியும் வருகின்றது.  

     

    இந்த நிலையில் உணர்ச்சிப்பூர்வமாக எடுக்கப்படும் முடிவுகளினால், ஆட்சி மாறி எதிர் மறையான சிந்தனைகள் உதித்தால், 70 ஆண்டுகளாகப் பயணித்து வந்த தேசிய முன்னணி மற்றும் ம.இ.கா நினைவுக்கு வந்தும் எந்த பயனில்லாமல் போய்விடும்.    எதிர்க்கட்சி கூட்டணியில் நமது இனத்தைப் பிரதிநிதிக்கும் கட்சிகள் இல்லை. தேசிய முன்னனி கூட்டணியில் நாம் நிரந்தரப் பங்காளி. எதிர்க்கட்சி கூட்டணியில் நாம் வெறும் தொண்டர்கள் என்பதை நாம் நினைவில் கொள்ளவேண்டும்.

     

    அப்போது, எப்படி அன்றைய சேரன், சோழன், பாண்டியன் ஆட்சியை இழந்து விட்டு, பழைய வரலாற்றை மட்டும் கண்ணீரோடு உரசிப் பார்க்க முடிகிறதோ அதே போன்ற நிலைதான் மஇகாவுக்கும் நம் சமுதாயத்திற்கும் ஏற்படும்.

     

    அதனால், மே 9 ஆம் தேதி நாம் தேசிய முன்னணிக்கும் அக்கூட்டணியில் இடம் பெற்றுள்ள மஇகா வேட்பாளருக்கும் வாக்களித்து ஆதரிப்போம். உணர்ச்சிவசப்பட்டு முடிவெடுக்காமல் நிதானமாக யோசித்து நமது நாட்டின் எதிர்காலத்தைச் சிறந்த முறையில் தீர்மாணிப்போம்.

    ...
    இன பாகுபாடு இன்றி மலேசியர்களுக்கு முன்னுரிமை!

    இன பாகுபாடு இன்றி மலேசியர்களுக்கு முன்னுரிமை!...

    07/05/2018

    கெலானாங், மே 7:

    கோலா லங்காட் நாடாளுமன்ற உறுப்பினராக தேர்வு செய்யப்பட்டால், இன மற்றும் மத பாகுபாடு இன்றி மலேசியர்கள் அனைவருக்கும் உதவிக்கரம் நீட்ட தாம் தயார் என நம்பிக்கை வார்த்தை வழங்கினார் ஷாரில் ஹம்டான். 

    கோலா லங்காட் இந்தியர்களும் கல்வி, பொருளாதாரம், வர்த்தகம் ஆகிய ரீதியில் வளர்ச்சி காண வேண்டும். அதற்கு தேவையான அனைத்து உதவிகளையும் ஒருங்கிணைக்க தம்மால் இயலும் என தேசிய முன்னணியின் இளம் வேட்பாளரான ஷாரில் தெரிவித்தார். 

    அண்மையில் கெலானாங் கிளை மஇகா உறுப்பினர்களுடன் நடைபெற்ற சந்திப்பில் கலந்து கொண்டபோது, ஷாரில் இவ்வாறு கூறினார். இந்தச் சந்திப்பில் மலிவு விலை வீடுகள், கல்வி மற்றும் வர்த்தக நிதியுதவி, வணிக வாய்ப்புகள் குறித்து கலந்துரையாடப்பட்டன. 

    இச்சந்திப்பின் வழி, கோலா லங்காட் இந்தியர்களின் தேவைகளை குறிப்பெடுத்துக் கொண்ட ஷாரில், வரும் பொதுத் தேர்தலில் தாம் வெற்றி பெற்றால், நிச்சயம் இந்திய சமுதாயத்திற்கு நற்செய்தி உண்டு என உறுதியளித்தார்.

    ...
    தேர்தலுக்காக முளைத்திருக்கும் காளான்கள் தேவையில்லை: சிகாமாட் வாழ் மக்கள்

    தேர்தலுக்காக முளைத்திருக்கும் காளான்கள் தேவையில்லை: சிகாமாட் வாழ் மக்கள்...

    06/05/2018

    2004-ஆம் ஆண்டின் தேர்தலுக்குப் பிறகு சிகாமாட் மக்களின் மேம்பாட்டிற்காக டத்தோஸ்ரீ டாக்டர் ச. சுப்பிரமணியம் பல்வேறு முயற்சிகளை மேற்கொண்டு வருகின்றார் என்றால் மிகையாகாது. பல்வேறு முயற்சிகளுக்குப் பிறகு , இன்று சிகாமாட் மாவட்டம் குறிப்பாக ஜெமிந்தா, கிம்மாஸ் பாரு, பத்து அன்னம் மற்றும் பூலோ காசாப் போன்ற வட்டாரங்கள் உருமாற்றம் கண்டுள்ளதை கண்கூடாக காண முடிகிறது.

    அவரது நற்சேவை இந்நாடாளுமன்றத்தில் தொடர வேண்டும் என்று சிகாமாட் வாழ் மக்களால் பெரிது எதிர்ப்பார்க்கப்படுகின்ற வேளையில், இது வரையில் ரிம 3716,000.00 செலவில் தேசிய மாதிரி நாகப்பா தோட்டத் தமிழ்ப்பள்ளியின் இடமாற்ற நிர்மாணிப்பு, அறிவியல் கூட நிர்மாணிப்பு, மண்டப நிர்மாணிப்பு மற்றும் அதன் இணைக்கட்டட நிர்மாணிப்பு பணிகள்  மேற்கொள்ளப்பட்டுள்ளன. அதனையடுத்து, ஜெமிந்தா மகா மாரியம்மன் ஆலயம் மற்றும் ஆலய மண்டப நிர்மாணிப்புப் பணிகளும் மேர்கொள்ளப்பட்டுள்ளன. ஜெமிந்தா வட்டார வீட்டு மறுசீரமைப்புப் பணிகளும் திட்டமிட்டப்படி நிறைவுற்றுள்ளது.

    கிம்மாஸ் பாரு வட்டார திட்டங்களுக்கு இதுவரையில் சுமார் ரிம 4260,000.00 ஒதுக்கப்பட்ட வேளையில், தேசிய மாதிரி போட்ரோஸ் தோட்ட தமிழ்ப்பள்ளியின் பெற்றோர் ஆசிரியர் சங்க நிதி, இடமாற்ற நிர்மாணிப்பு, இணைக்கட்டட வசதி நிர்மாணிப்பு, பூப்பந்து வளாக நிர்மாணிப்புக்காக அந்நிதிகள் செலவிடப்பட்டுளன. இதற்கிடையில், கிம்மாஸ் பாரு மகா மாரியம்மன் ஆலய மண்டப நிர்மாணிப்பு, தாமான் பிந்தாங் வளைப்பந்து மைதானத்தில் மேடை மற்றும் மண்டப நிர்மாணிப்பு திட்டங்களுக்கும் நிதிகள் வழங்கப்பட்டுள்ளன. கிம்மாஸ் பாரு வட்டார ஆலயம் மற்றும் அரசு சாரா இயக்க நிதியும் வழங்கப்பட்ட வேளையில், கிம்மாஸ் பாரு மற்றும் கோமாளி தோட்ட மின்சுடலை நிர்மாணிப்பணிகளும் மேற்கொள்ளப்பட்டுள்ளன.  கிம்மாஸ் பாரு வட்டார வீட்டு மறுசீரமைப்பு பணிகளின் திட்டங்களும் அடங்கும்.

    பத்து அன்னம் வட்டாரத்திலும் பல திட்டங்கள் நிறைவடைந்துள்ளன. குறிப்பாக, தாமான் டேசா இந்திய மண்டபச் சீரமைப்பு, தேசிய மாதிரி பத்து அன்னம் தமிழ்ப்பள்ளியின் நிர்மாணிப்பு, கெனாங்கான் கிராமத்தில் சாக்கடை நிர்மாணிப்பு, சுங்கை செனாருட் தோட்ட மகா மாரியம்மன் ஆலய நிர்மாணிப்பு, கோமாளி தோட்ட  மகா மாரியம்மன் ஆலய நிர்மாணிப்பு, தேசிய மாதிரி கோமாளி மற்றும் சுங்கை செனாருட் தோட்டத் தமிழ்ப்பள்ளிகளின் நிர்மாணிப்பு பணிகள் நிறைவேற்றப்பட்டுள்ளன. பத்து அன்னம் வட்டார வீட்டு மறுசீரமைப்புப் பணிகளும் பல இடங்களில் மேற்கொள்ளப்பட்டுள்ளன.

    அதே வேளையில், பூலோ காசாப்பிலும் பல மேம்பாட்டுத் திட்டங்கள் நிறைவடைந்துள்ளன. குறிப்பாக, தேசிய மாதிரி சுங்கை மூவார் தோட்டத் தமிழ்ப்பள்ளிக்கு 4 ஏக்கர் நிலம், ஆலய மேம்பாடிற்காக பூலோ காசாப் மகா மாரியம்மன் ஆலயதிற்கு 1 ஏக்கர் நிலம், சுங்கை மூவார் தோட்ட ஆலயம், கல்லறை நிர்மாணிப்பு மற்றும் பூலோ காசாப் வட்டார வீட்டு மறுசீரமைப்புப் பணிகள் மேற்கொள்ளப்பட்டன என்பது குறிப்பிடத்தக்கது.

    சிகாமாட் மாவட்டத்தில் ஆலய மேம்பாட்டிற்கு மட்டுமல்லாமல், சிகாமாட் மாவட்ட இந்திய மின்சுடலை நிர்மாணிப்பு பணிகள் மற்றும் சிகாமாட் நாடாளுமன்ற கல்வி பணியகக் கட்டட நிர்மாணிப்புப்பணிகள் மக்களின் நலன் கருதி மேற்கொள்ளப்பட்டு நிறைவடைந்துள்ளதும் குறிப்பிடத்தக்கது.

    சிகாமாட் நாடாளுமன்ற உறுப்பினராக பதவியேற்ற காலம் தொட்டு டாக்டர் சுப்பிரமணியம் அவர்கள் ஒவ்வொரு வாரமும் சிகாமாட்டிற்கு விஜயம் தருகிறார். நாடாளுமன்ற மக்களுக்காக தொடர்ந்து சேவையாற்றி வரும் சிறந்த தலைவர் இருக்கும் போது தேர்தலுக்காக திடீரென்று முளைத்திருக்கும் காளான்கள் நம்பி காத்திருக்க விருப்பமில்லை என சிகாமாட் வாழ் இந்திய மக்கள் கருத்துப் பகிர்ந்துள்ளனர்.

    ...
    மகளிர் தொழில்முனைவர்களுக்கு சிறப்புப் பயிற்சிகள்! ஷாரில் ஹம்டான் உறுதி

    மகளிர் தொழில்முனைவர்களுக்கு சிறப்புப் பயிற்சிகள்! ஷாரில் ஹம்டான் உறுதி...

    05/05/2018

    கோலா லங்காட், மே 5:

    கோலா லங்காட் தொகுதியில் சிறு மற்றும் நடுத்தர வியாபாரத்தில் ஈடுபட்டுள்ள பெண் தொழில்முனைவர்களின் வாழ்வாதாரத்தை மேம்படுத்தும் வகையில், அவர்களுக்கு பயிற்சிகள் வழங்கப்படுவதை தாம் நிச்சயம் உறுதி செய்யவுள்ளதாக கோலா லங்காட் தேமு வேட்பாளர் ஷாரில் ஹம்டான் தெரிவித்தார்.

     

    பொதுத் தேர்தல் பிரச்சாரத்தை முன்னிட்டு கடந்த சில நாட்களாக மேற்கொண்ட ஆய்வில், பெண் தொழில்முனைவர்களுக்கு பயிற்சிகளை வழங்கினால், அவர்களின் வியாபாரத்தை விருத்தியடையச் செய்வதோடு, வருமானத்தை உயர்த்த முடியும் என்பது தெரிய வந்தது.

    தேசிய முன்னணி மகளிருக்கு முக்கியத்துவம் வழங்கியுள்ளதை அதன் தேர்தல் கொள்கையறிக்கையின் வாயிலாக அறிய முடிகின்றது. தேசிய அளவில் முன்னெடுக்கப்படும் மகளிருக்கான திட்டங்களை கோலா லங்காட்டுக்கு கொண்டுவர தம்மால் முடியும் என்றார் அவர்.

     

    மேலும், தேசிய முன்னணியின் இளம் வேட்பாளரான தமக்கு வாய்ப்பு வழங்கப்பட்டால், கோலா லங்காட்டின் மேம்பாட்டையும், அனைத்து இனத்தவருக்குமான வளர்ச்சியையும்  உறுதி செய்யவுள்ளதாக அவர் வாக்குறுதி வழங்கினார்.

     

    நேற்று சுங்கை புவாயா மண்டபத்தில் ‘ஹெல்பிங் ஹேன்ட்ஸ்’ அமைப்பின் ஏற்பாட்டில் நடைபெற்ற அன்னையர் தினக் கொண்டாட்டத்தில் கலந்து கொண்ட ஷாரில் ஹம்டான் இவ்வாறு செய்தியாளர்களிடம் கூறினார். இந்த நிகழ்வில் 300க்கும் மேற்பட்ட தாய்மார்கள் கலந்து கொண்டனர்.

     

    இந்நிகழ்வில், இலவச மருத்துவ பரிசோதனை, இலவச சிகை அலங்காரம், சேமநிதி வாரிய சேவை ஆகியவையும் ஏற்பாடு செய்யப்பட்டிருந்தன என நிகழ்ச்சியின் ஒருங்கிணைப்பாளர் சந்திரா சன்னாசி தெரிவித்தார்.

     

    இதனிடையே, பொதுத் தேர்தலில் முதல் தடவை வாக்களிக்கும் இளைஞர்கள் அறிவார்ந்த தேர்வை மேற்கொள்ள வேண்டும். இணையத்தில் வெளியிடப்படும் தகவல்கள் அனைத்துமே உண்மையானவை அல்ல. அவற்றை பகுத்தறிந்து, இளைஞர்களின் எதிர்காலத்தை வளப்படுத்தும் அரசுக்கு வாய்ப்பளிக்க வேண்டும் என ஷாரில் அறிவுறுத்தினார்.

    ...
    டத்தோ லோகாவின் பதாகைகளை சேதப்படுத்துவதா?

    டத்தோ லோகாவின் பதாகைகளை சேதப்படுத்துவதா?...

    04/05/2018

    சிகாம்புட், மே 4:

    சிகாம்புட் தொகுதியில் தேசிய முன்னணி சார்பில் போட்டியிடவிருக்கும் டத்தோ லோக பால மோகனின் பதாகைகளைச் சேதப்படுத்திய பொறுப்பற்ற தரப்பினர் மீது தாமான் கொக்டோ கிளை மசீச தலைவர் டான் ஹோய் சியூ போலீஸ் புகார் செய்தார்.

    தேமு சார்பாக போட்டியிடவிருக்கும் டத்தோ லோகாவின் தேர்தல் கொள்கைஅறிக்கை அடங்கிய பதாகைகள் கடந்த 3 தினங்களுக்கு முன்பு தாமான் கொக்டோ பகுதியில் பொருத்தப்பட்டது.

    அவரின் சேவையை அனைத்து மக்களும் அறிய வேண்டும் என்ற நோக்கத்தில் பொருத்தப்பட்ட இந்தப் பதாகைகளில் அவரின் படத்தை மட்டும் கிழித்துள்ளது கண்டிக்கத்தக்கது.

     

    பொதுத் தேர்தலின் போது பிரச்சாரம் செய்வது வழக்கமான ஒன்றாகும். ஆனால், அந்த பிரச்சாரங்கள் நேர்மையான முறையில் மேற்கொள்ளப்பட வேண்டும். அதை விடுத்து, இதுபோன்ற கீழறுப்பு வேலைகளில் ஈடுபடுவது வெறுப்பு அரசியலுக்கு வழிவகுத்து விடும் என்றார் டான் ஹோய் சியூ.

     

    இதனிடையே, இச்சம்பவம் குறித்து கருத்துரைத்த மைபிபிபி தேசிய இளைஞர் பிரிவுத் தலைவர் சத்தியா சுதாகரன், இதுபோன்ற நடவடிக்கைகள் தவிர்க்கப்பட வேண்டும். வேட்பாளர்களுக்கு இடையே, நேர்மறையான போட்டி இருக்க வேண்டுமே தவிர, எதிர்மறையான உணர்வுகளுக்கு இடமளிக்கக் கூடாது என்றார். 

    ...
    டத்தோ லோகாவின் துணையமைச்சர் அனுபவம் மாற்றத்திற்கு வழிவகுக்கும்

    டத்தோ லோகாவின் துணையமைச்சர் அனுபவம் மாற்றத்திற்கு வழிவகுக்கும்...

    04/05/2018

    கோலாலம்பூர், மே 4: கூட்டரசுப் பிரதேச நகர்ப்புற நல்வாழ்வு துணையமைச்சர் பதவியின் வாயிலாகப் பெறப்பட்ட அனுபவம், சிகாம்புட் நாடாளுமன்றத்தின் மாற்றத்திற்கும் உயர்வுக்கும் துணைபுரியும் என சிகாம்புட் நாடாளுமன்றத் தொகுதியின் தேசிய முன்னணி வேட்பாளர் டத்தோ லோக பால மோகன் தெரிவித்தார். 

     

    இங்குள்ள மக்களின் நாடித் துடிப்பை அறிந்தவன் என்ற காரணத்தினால்தாம் தேசிய முன்னணியால் தேர்ந்தெடுக்கப்பட்டிருக்கிறேன். கடந்த ஐந்து ஆண்டுகளாக இங்குதான் வேலை செய்கிறேன். ஒவ்வொரு பகுதியிலும் என்னென்ன பிரச்சினைகள் இருக்கின்றன என்பதை நான் நன்கு அறிவேன். எனவே, வரும் 9ஆம் தேதி நடைபெறவிருக்கும் 14ஆவது பொதுத் தேர்தலில் எனக்கு வாய்ப்பளியுங்கள். நிச்சயமாக உங்களின் எதிர்ப்பார்ப்புகளும் கோரிக்கைகளும் பூர்த்திச் செய்யப்படும் என்றார் அவர். 

     

    ஒவ்வொரு முறையும் பொதுத் தேர்தல் என்று வரும்போது எதிர்க்கட்சியினர் தங்களின் வெற்றிக்காகவே பாடுபடுகின்றனர். தொகுதி விட்டு தொகுதி தாவுவதில் கைத்தேர்ந்தவர்களாக எதிர்க்கட்சியினர் முன்னிலை வகிக்கின்றனர். இந்தப் பொதுத் தேர்தலில் சிகாம்புட் நாடாளுமன்றத் தொகுதியில் பக்காத்தான் ஹராப்பான் சார்பாக களமிறங்கியிருக்கும் ஜசெகவின் வேட்பாளர் ஹன்னா இயோ, சிகாம்புட் மக்களுக்கு ஒருபோதும் முறையான சேவையை வழங்குவார் என்பது கேள்விக்குறியே.

     

    ஒரு தொகுதியில் களமிறங்குபவர் மக்களின் சூழலை அறிந்தவராக இருக்க வேண்டும். தொகுதி மக்களை அறிந்தவரால் மட்டுமே அவர்களுக்கு நிறைவான சேவையை வழங்க வேண்டும். ஒவ்வொரு முறையும் தொகுதி தாவுகின்றவர்கள், அவர்களின் தொகுதியைக் கைப்பற்றுவதில் மட்டுமே குறியாக இருப்பார்கள். எனவே, சிகாம்புட் நாடாளுமன்ற வாக்காளர்கள் தெளிவான சிந்தனையுடன் தங்களின் வாக்குகளைச் செலுத்த வேண்டும் என டத்தோ லோக பால மோகன் கேட்டுக் கொண்டார். 

     

    நேற்று முன்தினம், இங்குள்ள காசிப்பிள்ளை வளாகத்தில் நடைபெற்ற 'கலக்கல் கலைநிகழ்ச்சி'யில் கலந்து கொண்டு உரையாற்றும்போது டத்தோ லோகா இவ்வாறு பேசினார்.

     

    தேசிய முன்னணி அரசாங்கத்தால் மட்டுமே மக்களுக்கு முன்னுரிமை வழங்க முடியும் என்பதைக் கடந்த 60 ஆண்டுகளாக நாம் நன்கு அறிந்து வருகிறோம். ஆனால், எதிர்க்கட்சியினால் பல்வேறு குழப்பங்களை மட்டுமே ஏற்படுத்த முடியும். அவர்களுக்கு மீண்டும் வாய்ப்பு கொடுப்பதன் வாயிலாக இங்குள்ள மக்களின் வாழ்வாதாரத்தில் எவ்வித மாற்றமும் ஏற்படப்போவதில்லை என்பதையும் கருத்தில் கொள்ள வேண்டும். 

     

    சிகாம்புட் நாடாளுமன்றத்தைச் சேர்ந்த மக்களுக்காக 6 அம்ச தேர்தல் கொள்கை அறிக்கையை வெளியிட்டிருக்கிறேன்.  இந்த 6 அம்சங்கள் யாவும் வரும் ஐந்து ஆண்டுகளில் நிறைவேற்றப்படக் கூடியவையாகும். நம்மால் நிறைவேற்ற முடியாத கோரிக்கைகளை வெளியிடக்கூடாது என்பதில் நான் தெளிவாக இருக்கிறேன். எனது தேர்தல் கொள்கை அறிக்கை மலாய்க்காரர்கள், சீனர்கள், இந்தியர்கள் என அனைவரையும் உட்படுத்தியதாகும். ஓர் இனத்திற்கு மட்டுமே முக்கியத்துவம் கொடுக்கும் வகையில் எனது தேர்தல் அறிக்கை அமையவில்லை என்பதையும் டத்தோ லோகா பால மோகன் வலியுறுத்தினார். 

     

    இதனிடையே, நேற்று முன்தினம் நடைபெற்ற கலக்கல் கலை நிகழ்ச்சியில் மைபிபிபியின் இடைக்கால தேசியத் தலைவர் டத்தோஶ்ரீ மெக்லின் டென்னிஸ் டி'குருஸ், துணைத் தலைவர் டத்தோ ஸக்காரியா, தகவல் பிரிவுத் தலைவர் டத்தோ சைமன் சுரேஸ் வருணமேகம், தேசிய இளைஞர் பிரிவுத் தலைவர் சத்தியா சுதாகரன் உட்பட மேலும் பல பிரமுகர்களும் கலந்து கொண்டனர்.

    ...
    சுங்கை பூலோ மக்களுக்கு 3 முதன்மை செயல்திட்டங்கள்:  தேமு வேட்பாளர் பிரகாஷ் ராவ் வாக்குறுதி

    சுங்கை பூலோ மக்களுக்கு 3 முதன்மை செயல்திட்டங்கள்: தேமு வேட்பாளர் பிரகாஷ் ராவ் வாக்குறுதி...

    04/05/2018

    கோலாலம்பூர், மே 5:

    சுங்கை பூலோ தொகுதி மக்களின் வளர்ச்சியையும் மேம்பாட்டையும் உறுதிசெய்ய 3 முதன்மை திட்டங்களை முன்னெடுக்கவுள்ளதாக அத்தொகுதியின் தேசிய முன்னணி (தேமு) வேட்பாளர் பிரகாஷ் ராவ் உறுதியளித்தார்.

     

    14ஆவது பொதுத் தேர்தலில் சுங்கை பூலோ நாடாளுமன்றத் தொகுதியில் போட்டியிடும் பிரகாஷ் ராவ், தாம் வெற்றி பெற்றால் இங்குள்ள மக்களின் நலனை முன்னிறுத்தி உருமாற்ற சேவை மையத்தை அமைக்கவுள்ளதாக தெரிவித்தார்.

    இந்த சேவை மையத்தில் சுங்கை பூலோ மக்கள் தங்களின் தேவைகளைத் தெரிவிக்கலாம். கல்வி, நிதியுதவி, ஆபத்து அவசர உதவிகள் என பல சேவைகளை இம்மையம் ஒருங்கிணைக்கும்.

    நேரடியாக மையத்திற்கு வர இயலாதவர்கள், இணையம் வாயிலாக தங்களின் புகார்களைன் அல்லது கோரிக்கைகளைத் தெரிவிக்க ஒரு சிறப்பு அகப்பக்கம் அமைக்கப்படும். இதில் இணையம் வழி கல்வி, இணையம் வழி சமூகச் சேவை, இணையம் வழி வர்த்தக உதவி போன்ற இலவச சேவைகளை வழங்கப்படவிருக்கின்றன என்றும் அவர் கூறினார்.

     

    “சுங்கை பூலோ கடந்த 10 வருடங்களாக பிகேஆர் வசம் இருந்தது. ஆனால், இங்குள்ள மக்களுக்கு பெரிதாக ஏதும் செய்துவிடவில்லை. இம்முறை எனக்கு வாய்ப்பு வழங்கப்பட்டால், சுங்கை பூலோ தொகுதியில் உருமாற்றத்தை நான் ஏற்படுத்தித் தருவேன்” என நேற்று தமது கொள்கையறிக்கையை வெளியிட்ட பிரகாஷ் ராவ் தெரிவித்தார்.

    “இங்குள்ள மக்கள் மாற்றத்தை எதிர்ப்பார்க்கிறார்கள். மலாய்க்காரர்கள், இந்தியர்களின் ஆதரவை நான் பெற்றுள்ளேன். கடந்த பொதுத் தேர்தலில் நான் தோல்வி கண்டிருந்தாலும், மக்கள் சேவையிலிருந்து ஒருபோதும் விடுபடவில்லை. ஆகையால், இங்குள்ள மக்களிடையே நன்மதிப்பைப் பெற்றுள்ளேன்” என்றும் அவர் விளக்கினார்.

    ...
    சிகாமாட் சுங்கை மூவார் குழுவகத் தமிழ்ப்பள்ளிக்கு 4 ஏக்கர் நிலம்:  டாக்டர் சுப்பிரமணியத்தின் பேருதவியை நினைவு கூரும் தலைமையாசிரியர்

    சிகாமாட் சுங்கை மூவார் குழுவகத் தமிழ்ப்பள்ளிக்கு 4 ஏக்கர் நிலம்: டாக்டர் சுப்பிரமணியத்தின் பேருதவியை நினைவு கூரும் தலைமையாசிரியர்...

    04/05/2018

    1926ஆம் ஆண்டு தோற்றுவிக்கப்பட்ட சிகாமாட் தேசிய வகை சுங்கை மூவார் குழுவத் தோட்டத் தமிழ்ப்பள்ளியானது 18 மாணவர்களை மட்டும் கொண்டு தொடங்கப்பட்டது. தற்பொழுது சிகாமாட் நாடாளுமன்றத்தில் முதல் குழுவகத் தமிழ்ப்பள்ளியாக உருமாற்றம் கண்டு சிகாமாட் நாடாளுமன்றத்தில் சிறந்த தமிழ்ப்பள்ளியாகவும் திகழ்கின்றது.

     

     

    தோட்டப்புறத்தில் சிறிய அளவில் இருந்தாலும் அனைத்து வசதிகளையும் கொண்ட தமிழ்ப்பள்ளியாகவும் மாணவர்களின் கல்வி அடைவுநிலை, புறப்பாட நடவடிக்கை என அனைத்திலும் தொடர் வளர்ச்சியையும் இப்பள்ளிக்கூடம் பதிவு செய்து வருவதும் இங்கு குறிப்பிடத்தக்கது.

     

     

    இதுகுறித்து இப்பள்ளியின் தலைமையாசிரியர் திருமதி பிரேமா இராமகிருஷ்ணன் கருத்துரைக்கையில், 2014ஆம் ஆண்டில் இப்பள்ளிக்குக் குழுவகத் தமிழ்ப்பள்ளி எனும் அங்கீகாரம் கிடைத்தது.

     

    அக்காலக்கட்டத்தில் பள்ளிக்கூடத்தின் துரித வளர்ச்சிக்குப் பக்கபலமாக இருந்தது டாக்டர் சுப்பிரமணியம் அவர்கள்தான். 

    கடந்த 2015ஆம் ஆண்டு தொடங்கி இதுவரையில் ஏறக்குறைய 216,000 வெள்ளிக்கும் மேல் இப்பள்ளிக்கு நிதியுதவியாக வழங்கியுள்ளார்.    

     

    மேலும், ஒவ்வோர் ஆண்டும் யூபிஎஸ்ஆர் மாணவர்களுக்குச் சிறப்பு வகுப்பு நடத்துதற்கான செலவுத் தொகை முழுவதும் டாக்டர் சுப்பிரமணியம் அவர்களே ஏற்றுக் கொண்டார். சிறிய பள்ளியாக இருந்தப்போதிலும் இப்பள்ளியில் மற்ற குழுவகப் பள்ளிகளுக்கு நிகரானதாகவும் தரமானதாகவும் இருக்க வேண்டுமென்பதில் டாக்டர் சுப்பிரமணியம் அவர்கள் மிகவும் உறுதியாகவே செயல்பட்டார்.

     

    அதன் அடிப்படையில், இப்பள்ளிக்குத் தேவையான தளவாட வசதிகள், ஒவ்வொரு வகுப்பறையிலும் "ஸ்மார்ட் தொலைக்காட்சி வசதி", குளிர்சாதான அறை வசதி, நூலக வசதி, கணினி அறை என சகல வசதிகளையும் இப்பள்ளிக்காக ஏற்பாடு செய்து கொடுத்திருக்கிறார். ஒவ்வொரு முறையும் இப்பள்ளிக்குத் தேவையான நிதிகளை நாங்கள் கேட்பதற்கு முன்னதாகவே அறிந்து தேவைக்கு அதிகமாகவே இதுநாள்வரையில் டாக்டர் சுப்பிரமணியம் அவர்கள் வழங்கியுள்ளார்.

     

     

     

    இப்பள்ளியின் வளர்ச்சியின் ஒவ்வொரு முயற்சியில் மட்டுமின்றி இப்பள்ளியின் ஒவ்வொரு தூண்களிலும் டத்தோஸ்ரீ டாக்டர் ச.சுப்பிரமணியம் அவர்களே நிறைந்து இருப்பதாக இப்பள்ளியின் தலைமையாசிரியர் திருமதி பிரேமா இராமகிருஷ்ணன் குறிப்பிட்டார்.

    ...
    கோலா லங்காட் இந்தியர்களின் மேம்பாடு உறுதிசெய்யப்படும்

    கோலா லங்காட் இந்தியர்களின் மேம்பாடு உறுதிசெய்யப்படும்...

    04/05/2018

    கோலா லங்காட், மே 5:

    கோலா லங்காட் நாடாளுமன்ற உறுப்பினராக தாம் தேர்வுசெய்யப்பட்டால், இந்தியர்களின் பிரச்சினைகளுக்குத் தீர்வு கண்டு அவர்களின் முன்னேற்றத்திற்கு வழிவகுத்து தரவிருப்பதாக கோலா லங்காட் தொகுதியின் இளம் தேமு வேட்பாளர் ஷாரில் ஹம்டான் வாக்குறுதி வழங்கினார்.

    “கோலா லாங்காட்டின் பொருளாதார வளர்ச்சிக்கு இந்தியச் சமூகம் ஆற்றியுள்ள சேவைகள் மறுக்க முடியாதவை. அவற்றை மதிக்கும் நான், இந்திய சமூகத்தின் கல்வி, பொருளாதார, வாழ்வாதார வளர்ச்சிக்குத் துணை புரிவேன்” என்றார் அவர். 

    மலேசிய இளையோர் மன்றத்தின் கீழ் செயல்படும் இந்து இளைஞர் இயக்க ஏற்பாட்டில் கோலா லங்காட் இந்திய அமைப்புகளின் தலைவர்களுடன் நேற்று முன்தினம் நடைபெற்ற சந்திப்பு ஒன்றில் பேசிய ஷாரில் இவ்வாறு தெரிவித்தார்.

    இந்தச் சந்திப்பில் 20 இந்திய அமைப்புகளின் தலைவர்கள் கலந்து கொண்டனர். கோலா லங்காட்டில் தமிழ்ப்பள்ளிகளின் மேம்பாடு, சமூக உருமாற்றும் மையங்களாக கோயில்கள் செயல்பட வேண்டியதன் அவசியம், தரம் உயர்த்தப்பட வேண்டிய மின்சுடலை மையங்கள் என பல்வேறு சமூக பிரச்சினைகள் ஷாரிலின் பார்வைக்கு கொண்டு செல்லப்பட்டன. 

    இப்பிரச்சினைகளை பொறுமையாக செவிமடுத்த ஷாரில், தாம் நாடாளுமன்ற உறுப்பினராக தேர்வு செய்யப்பட்டால், நிச்சயம் இவற்றிற்கு சுமூக தீர்வை வழங்குவதாக உறுதியளித்தார். அதோடு, 6 மாதங்களுக்கு ஒரு முறை இந்திய சமூகத்தை சந்தித்து, அவர்களின் பிரச்சினைக்கு முற்றுப்புள்ளி வைக்க தம்மால் இயன்றவற்றை செய்வதாகவும் அவர் கூறினார். 

    இதனிடையே, ஷாரில் கோலா லங்காட் நாடாளுமன்ற உறுப்பினராக தேர்வானால், சிறப்பு செயலகம் ஒன்று அத்தொகுதியில் அமைக்கப்படும் என தமது தேர்தல் கொள்கையறிக்கையில் குறிப்பிட்டிருந்தார். கல்வி கடனுதவி, வர்த்தக நிதியுதவு, ஆபத்து அவசர நிதியுதவி தேவைப்படுவோர் அச்செயலகத்தில் விண்ணப்பிக்கலாம் என்றும் கேட்டுக் கொள்ளப்பட்டது.  

    ...